Yunity: Informe negativo

Como sabedes, a empresa ten a intención de implantar un novo sistema de xestión de vacacións e permisos: Yunity. A aplicación deste sistema arrancou en Madrid dun xeito conflitivo.

En Vigo, a empresa fixo unha presentación power-point, sen achegar ningún documento, sen resolver as dúbidas que plantexamos e sen negociación previa, motivo polo cal dende a Sección Sindical da CIG emitimos un informe negativo.

Como dixo Marcuse, a tecnoloxía non é neutra. Todos os avances que se deron dende a Revolución Industrial non valeron para reducirnos os horarios aos/ás traballadores/as, nin para pagarnos máis, nin para garantir dereitos laborais (pese ao aumento de produción). Serviron para beneficiar exclusivamente aos propietarios deses medios de produción, aos empresarios, aos capitalistas (que pagándolles a menos traballadores/as gañaban moitísimos máis cartos). As melloras viñeron da loita sindical e política da clase obreira, non da man da tecnoloxía.

Yunity ou WFM, teñen esa mesma natureza. O departamento actual de turnos non será como o coñecemos cando estas dúas ferramentas funcionen de xeito correcto. As persoas poden escoitar e dialogar, as máquinas asignan sen ter en conta necesidades humanas; aquí suprimiranse postos de traballo, que serán substituídos por aplicacións informáticas. Neste caso concreto, o impacto entendemos que é leve: trátase dun departamento de xestión reducido que será facilmente absorbido polas campañas.

Yunity pode supoñer vantaxes para o persoal, como facer as solicitudes cando o traballador ou a traballadora queira e non nun horario restrinxido, ver dispoñibilidades, etc., pero non debemos esquecer que esas cuestións son nimias. Ademais, a opacidade da empresa e a falta de diálogo non son as mellores referencias.

A Sección Sindical da CIG en Unísono propuxo en reiteradas ocasións, incluso co apoio da Inspección de Traballo, que sería positivo crear un sistema transparente de xestión das quendas, vacacións, festivos, etc. Agora que se implanta Yunity, sería o momento de negociar, non de impoñer. Por todo isto, o noso informe foi negativo, o primeiro paso por se nalgún momento fose preciso emprender accións xudiciais.

Nota: As eleccións sindicais serán para mediados de maio, tal e como establece a lexislación, nin un día antes, nin un día despois. Algúns levan meses de campaña electoral. Nós, traballando día a día.