CIG unísono

Levamos perdida unha paga en dous anos sen Convenio

2012-01-26T03:28:00.001-08:00

As empresas de Telemárketing non sofren as consecuencias da crise, pero pretenden que asumamos as consecuencias dunha crise que nós non provocamos e que elas non padecen. Algunha das grandes empresas deste sector, que nos nega a suba salarial, publicou que no primeiro semestre do ano pasado os seus beneficios subiron un 25% (Atento).

A suba do custe da vida superou con creces o propio incremento do IPC, pero en todo caso, en relación a ese indicador utilizado ata o de agora na negociación colectiva, dende o 2009 acumulamos unha perda de case 1 paga.

Salario 2009 Salario +IPC Perda acumulada

Teleoperador/a 12,956,18 13.655,81 701 euros
Tel. Especialista 13.550,16 14.281,87 732 euros

O IPC do ano 2010 pechou no 3%, o do 2011 pechou no 2,4%, pero os nosos salarios están conxelados dende o 2009. Malia que non subiron os salarios, o anterior Goberno subiu o IVE e autorizou subas no gas, correos, ou a electricidade (10%) no 2011.

A partir de febreiro de 2012 xurdirá efecto a suba de impostos (IRPF e IBI) aprobada polo novo Goberno Central: cobramos menos salario e pagaremos máis impostos. O Goberno retirou tamén a axuda ao aluguer. (Nese mesmo Consello de Ministros aprobaron axudas aos bancos por 100.000 millóns de euros). E xa anuncian subas da electricidade, gas, hipotecas ou auga.

As nosas empresas escusaranse en que a negociación do Convenio está bloqueada, á espera da reforma laboral e da negociación colectiva que prepara o PP e que conta coa complicidade de CCOO-UGT, que a negocian coa CEOE. Unha reforma para rebaixar dereitos e salarios.

Fronte a esta situación de inxustiza social, o 12 de xaneiro a CIG concentrouse en toda Galiza contra estas medidas do Goberno. Non aceptamos que as empresas manteñan conxelados os nosos salarios dende o 2009, mentres soben os prezos da vida e os impostos. Non hai escusa que valga, queremos que suban os salarios XA!, e se non o fan haberá conflito nas empresas. Xa está ben de tomarnos o pelo.

Se traballamos, temos dereito a un salario digno que, cando menos, nos dea para vivir, e non aceptamos baixo ningún concepto ampliar as facilidades para despedir ao actual persoal. Xa hai desempregadas/os de abondo, e despedir é demasiado doado no noso sector.

2011-12-28T15:02:00.001-08:00

Voceiro Unísono

Publish at Calaméo or browse others.

Último recorte do PSOE sen que teñamos un Convenio que nos ampare

2011-11-25T06:34:00.000-08:00

O BOE do 18 de novembro publica o Real Decreto 1543/ polo que se regulan as prácticas "non laborais" nas empresas, o último agasallo do PSOE ás patronais. Con este decretazo, que pode facer estragos no noso sector, rexorde a figura do "aprendiz".

As empresas poderán "contratar" aprendices, persoas entre os 18 e os 25 anos e incluso con experiencia no sector de ata 3 meses.

Non existirá relación laboral, non terán dereito ao desemprego, non cobrarán salarios e a única compensación serán unhas "bolsas" polo 80% do IPREM mensual (indicador que este ano está en 532 euros). O Real Decreto non regula o tipo de encomendas ou outras condicións labgorais que afectaran aos/ás aprendices.

iso si, a "contratación" de aprendices pode dar lugar a subvencións para as empresas que compensen os gastos derivados das accións de titoría e avaliación.

Coa última medidado PSOE as empresas poderán poñer persoal a traballar por 426 euros ao mes, o que pode facer que teñan a tentación de desfacerse de persoal actual.

O Convenio Colectivo Estatal continúa bloqueado pola patronal, sabedora de que as continuas reformas antisociais e laborais, antes do PSSOE e no futuro do PP, fortalecerán o seu poder. Din que queren o despedimento exprés, e para iso propoñen un novo redactado do artigo 17 que é ilegal (quizais coñezan algúns dos cambios que porá en marcha o novo goberno). Ademais, levamos 23 meses cos salarios conxelados, nun sector que non está en crise.

Fronte aos continuos cambios normativos que están debilitando aos traballadores e traballadoras, debemos blindar as nosas condicións laborais coa negociación dun Convenio marco que poña cota a ofensiva política das patronais e dos seus gobernos monicreques. Para iso é preciso abandonar o sectarismo sindical e propoñer medidas conxuntas co suficiente calado para forzar á Patronal a negociar. É preciso blindar os nosos postos de traballo.

2011-11-24T04:48:00.000-08:00

UNHA DE CAL E OUTRA DE AREA

2011-11-18T14:57:00.001-08:00

Onte, día 17 de novembro, a sección CIG xunto co resto de Comité, mantivemos unha reunión coa Empresa. Fomos convocados con moita urxencia polo Director de R.H., (José María Alonso) porque tiña algunhas novidades que contarnos.

A primeira nova que nos transmiten e que consideramos positiva, en canto que responde a unha das principais demandas por parte da nosa sección –o mantemento do traballo en Vigo- é que UNÍSONO nos transmitiu non só a creación dunha filial chamada ESTRATEGIAS CONTACT CENTER dentro das instalacións da Empresa, se non que tamén a posibilidade de contratación de novas campañas. Non cedemos, por suposto, no empeño da creación dunha bolsa de traballo con todo aquel persoal despedido (art. 17 e fin de obra) e seguimos traballando nese punto.

Unha de cal e outra de area; aquí chega a bomba:

UNÍSONO emitía onte unha circular na que nos notifica a contratación dun novo SERVIZO DE ATENCIÓN MÉDICA, que, basicamente, se encargará de verificar se a nosa baixa médica é real.

Preguntarédesvos se isto é legal. No artigo 20.4 do Estatuto dos Traballadores di que “O empresario poderá verificar o estado de enfermidade ou accidente do traballador/a que sexa alegado/a por este para xustificar as súas faltas de asistencia ao traballo, mediante recoñecemento a cargo de persoal médico. A negativa do traballador/a aos ditos recoñecementos poderá determinar a suspensión dos dereitos económicos que poidesen existir a cargo do empresario polas ditas situacións”.

Despois de manter unha primeira entrevista coa asesoría xurídica do noso sindicato, aconsellámosvos, ata novo aviso, que asistades porque a lei parece que denota unha certa obligatoriedade en canto á asistencia, aínda que a cesión de datos para a creación dun novo historial SI é VOLUNTARIA así que vos aconsellamos non aceptar cedelo.

Recorda que, segundo a Resolución do 21 de outubro do 2009 da Secretaría de Estado da Seguridade Social, díctanse instruccións para a compensación de gastos de transporte nos casos de asistencia sanitaria derivada de riscos profesionais e de comparecencias para a realización de exames ou valoracións médicas. Nós entendemos que todos os gastos derivados do desprazamentos á consulta teñen que ser abonados pola empresa (enfermidade común), a pesar da negativa desta.

Moi ó noso pesar, consideramos que este é un novo mecanismo por parte de UNÍSONO para presionar aos compañeiros/as en situación de baixa médica e forzar sibilinamente a súa reincorporación ao seu posto de traballo sen importarlle demasiado o seu benestar.

Desde a Sección CIG seguiremos asesorándonos e informándovos.

En Vigo, a 18 de novembro, 2011

UNÍSONO pecha os ollos e os/as axentes botamos a lingua

2011-11-02T10:30:00.000-07:00

Desde hai un tempo, desde a sección da CIG, vimos detectando unha serie de carencias que nos impiden desenvolver ben o noso traballo, e, tras recibir numerosas queixas pola vosa parte, decidimos solicitar unha xuntanza coa empresa para tratar estes puntos:

Un dos nosos temas de conversa recorrentes é o da formación. Desde sempre nos queixamos de que non hai plans formativos de actualización de coñecemento nos axentes. Cando os hai, son escasos e teñen unha única motivación: poder mover ás persoas de campaña cando lles interese para poder expremer aínda máis o beneficio que podemos xenerar. Este problema, non obstante, non atinxe só a axentes: hai coordinadores que non foron suficientemente formados e que, aínda tendo unha actitude impecable tanto no trato como nas súas ansias de autoformación, non están ó nivel que require a rutina das chamadas.

Outro dos temas que máis nos preocupa, e polo que se leva anos loitando, é por conseguir o

famoso “break”. Todos sabemos o abrumador que resulta coller chamadas sen descanso.

Pedímoslles 5 segundos de descanso, o que suporía non máis de dúas horas e media por axente ó mes: unha miseria que a empresa non está disposta a pagar porque segundo eles xa nos chegan de sobra os descansos que temos.

Observamos que nas últimas épocas, de feito, a cantidade de persoas de baixa aumentou e resulta doado atribuílo ó ritmo tan abafante de traballo que temos. O nivel de “absentismo” (así lle chaman os empresarios á determinación dun facultativo, como se implicase unha decisión activa por parte do traballador, cuestionando a labor do especialista), segundo nos comentan está nun 28% na campaña de Orange, cando o “normal” é un 11%.

A empresa accedeu a revisar (e agardamos que a atallar) as carencias formativas pero negouse rotundamente a valorar a posibilidade de darnos un respiro entre chamada e chamada, algo que, por outra parte, debería estar regulado polo Convenio. Debemos reunir forzas para conseguir, dunha vez por todas, dignificar as nosas condicións de traballo.

Accidentes de traballo in itinere

2011-11-02T10:21:00.000-07:00

Cando nos atopamos ante un accidente de traballo in itinere? A Lei Xeral da Seguridade Social define o accidente de traballo como toda lesión corporal que sofre o traballador con ocasión do traballo. A título meramente enunciativo, atopámonos ante un accidente de traballo cando concorren os seguintes requisitos: que se produza unha lesión corporal, que esta lesión sexa consecuencia dun traballo por conta allea e que exista unha relación de causalidade entre a lesión e a realización do traballo, entrando en xogo neste punto o que coñecemos como presunción de laboralidade, polo que se presume constitutivo dun accidente de traballo toda lesión que sofra o traballador durante o tempo e no lugar de traballo.

Como primeira idea, indicar que esta presunción non alcanza aos accidentes de traballo In itinere, onde a carga da proba recae sobre quen pretenda a calificación do accidente como laboral.

A continuación, exporemos de xeito xeralizado os requisitos que os Tribunais veñen esixindo para

calificar un accidente como In itinere:

-Que concorra no traxecto de ida ou volta ao traballo. Destes conceptos (lugar de traballo, domicilio do traballador e traxecto) ímonos deter brevemente nun deles: o domicilio do traballador, concepto que os Tribunais non limitan ao domicilio legal senón que abarca tamén ao domicilio real e habitual do traballador, entendido como lugar de residencia ou de estancia distinto á residencia principal do

traballador. Vexámolo cun exemplo: si constitúe accidente In itinere o accidente sufrido por un traballador cando se dirixía ao seu domicilio habitual durante a tempada de verán; pero non o constitúe o accidente que sofre un traballador no desprazamento que realizaba todas as fins de semana dende o seu centro de traballo ao domicilio da súa avoa nunha localidade distinta á que constitúe o domicilio habitual do traballador, nin tampouco o sufrido polo traballador cando se dirixía ao domicilio da súa moza.

-Que o traxecto empregado sexa o adecuado e habitual para ir ou voltar do traballo. Non se considerou accidente de traballo o sufrido polo traballador que non seguíu o camiño adecuado ao circular por un carril sen asfaltar no lugar de facelo pola estrada que recorría habitualmente.

-Que o medio de transporte empregado sexa adecuado para realizar o desprazamento. Seguindo co exemplo anterior, onde o traballador que circulando polo carril sen asfaltar o facía, ademais, conducindo unha moto da súa propiedade, o cal lle fora prohibido expresamente pola empresa, no lugar do servizo de transporte disposto pola empresa.

-Que no camiño de ida ou de regreso do traballo non sucedan interrupcións temporais ou desviacións significativas. Os Tribunais veñen esixindo que o accidente se produza nunha secuencia temporal inmediata ou razonabelmente próxima á entrada ou saída do traballo, admitindo, cun criterio flexíbel, interrupcións xustificadas ou momentáneas, como visitar a un fillo hospitalizado nun centro que quedaba de paso, parada dunha hora para almorzar no domicilio paterno, ...

Como xa queda dito máis arriba, será quen pretenda a calificación do accidente como laboral quen terá a carga de probar que concorren os requisitos anteriormente expostos. É por iso, que en caso de ocorrer un accidente laboral In itinere, e no mesmo momento en que este ocorre, deberase solicitar un informe policial sobre os feitos acaecidos, un parte de accidente ou testemuñas presenciais.

Despois do ERE, a loita continúa!

2011-11-02T10:16:00.000-07:00

Podemos considerar o pasado 24 de xuño como o venres negro de Unísono: en plena protesta polo artigo 17 e as súas 99 consecuencias, a empresa agasállanos cun ERE e co aviso de finalización de Orange Voz e Datos: 151 persoas ían ir á rúa cobrando 20 días por ano, ademáis das 111 persoas que inevitablemente lles finalizaba o seu contrato de obra, percibindo 8 días.

Desde a CIG non podiamos entender cómo Unísono, unha empresa con beneficios millonarios, perdía a pouca vergonza que lle quedaba intentando desfacerse de medio plantel moi cualificado, despois de ter este levantado co seu esforzo e sen ningún tipo de recompensa, campañas e campañas. Sabedores da Autoridade Laboral que temos -Unha Xunta antiobreira e antigalega, que firma cada un dos ERES que recibe-, non podiamos deixarlle ó azar e á Inspección de traballo – unha figura de doble cara e polo tanto de doble xogo- unha negociación que traía baixo o brazo gravísimas consecuencias.

Nós, sendo conscientes do risco que corrían os nosos postos, tomamos a iniciativa de traballar en prol do mantemento do traballo en Vigo, tendo sempre claro que o noso obxectivo era respaldar os vosos intereses, mantervos informados de todos os pasos que iamos dando e respectar o voso último veredicto. Dese veredicto e da dura negociación que levamos a cabo durante un mes, xurdiu a firma do acordo que hoxe temos: 52 postos afectados en dous períodos de 6 meses (polo tanto 104 persoas) que, no caso de veren suspendidos os seus contratos percibirán o 85% ou o 100% do seu salario, segundo estean ou non en períodos de formación, sen que o seu paro se vexa afectado. Todas aquelas persoas que desexaban rescindir o seu contrato fixérono cobrando unha indemnización de 28 días por ano, podendo acceder á prestación por desemprego. Todo isto, vixiado, como xa sabedes, por unha comisión de seguemento que vixía a transparencia da aplicación do ERE.

Despois de ternos situado no peor dos escenarios, poderiamos dicir que o resultado obtido nos permitiu dar un respiro. Un respiro breve, porque somos conscientes de que debemos seguir comprometidos co noso futuro laboral e sobre todo, debemos seguir mantendo unha actitude crítica: todo o proceso que acabamos de vivir non é unha situación illada; debemos, xa que logo, enmarcar o acontecido dentro dun contexto.

O contexto é o sistema capitalista e a súa crise: o Estado español, despois de poñer en mans privadas empresas pública (p.ex. Telefónica), de supeditar a maioría social ó interese de catro empresarios (p.ex. regalándolles reformas laborais que só promoven o empeoramento das nosas condicións), segue a facer a vista gorda cando empresas con beneficios millonarios se desfán do seu plantel porque lles “sobran” indefinidos (p.ex. Unísono) ou cando estas mesmas empresas moven o traballo a outros países con condicións moito peores cás nosas porque saben que alí lles sae aínda máis barato manter un servizo falsamente chamado de atención ó cliente (p.ex. Unísono e Orange).

Por todo isto, aínda que como dixemos a solución do ERE foi mellor do previsto, non estamos satisfeitas e sabemos que debemos seguir loitando por mellorar as condicións da clase traballadora en xeral e do sector do Telemárketing, que aínda segue sen convenio, en particular.

Non é xusto que sempre se repartan entre a minoria social as ganancias e se socialicen as débedas: loitemos todos xuntos polos nosos dereitos!

A CIG reclama a volta do traballo deslocalizado

2011-10-11T02:32:00.001-07:00

A patronal das empresas de telemárketing ACCE, fixo onte unha nova proposta na mesa negociadora do Convenio que resulta totalmente inasumible.

Pero mais ala das propostas na mesa a CIG considera unha traizón aos pobos do Estado Español que as empresas principais e as subcontratas de telemárketing manteñán 25.000 postos de traballo de atención aos clientes deslocalizados no norde de África ou en Ámerica Latina, nun momento de emerxencia social polo incremento do desemprego.

Proposta ACCE

Vixencia: 3 anos (2010-2011-2012).

Suba salarial: Desvincular a suba dos salarios do incremento do custe da vida (IPC).

Proposta suba salarial

2010 0%

2011 1,5%

2012 1,5%

Despedimentos colectivos (artigo 17): Malia que a petición de CCOO e UGT a patronal quedou na reunión anterior en facer unha proposta para poder despedir tamén ao persoal indefinido a través deste artigo, é dicir sen garantías. ACCE viu á reunión coas mans baleiras.

Novamente quedaron en facer unha proposta por escrito que nos remitiran antes do día 10 de novembro, data na que se reunirá de novo a mesa negociadora (dentro dun mes o que demostra a falta de interese da patronal por chegar a un acordo).

Posición da CIG

A patronal está conseguindo marcar os tempos da negociación e os contidos, xa non se fala mais que daquelas cuestións nas que teñen interese as empresas: recortar salarios e facilitar aínda mais os despedimentos.

O telemárketing non está en crise, cada vez un maior número de empresas principais deciden subcontratar a través de contact center para abaratar custes o que xera novas campañas. Outra cuestión é que moitas rematan deslocalizadas fora do Estado nun momento no que o paro acada cotas de autentica emerxencia social. Esiximos ás empresas de telemárketing que deixen de levarse o traballo a América ou África, cando na Galiza hai 232.918 persoas no paro.

Si as empresas principais e as contratas de telemárketing teiman en manter deslocalizados mais de 25.000 postos de traballo, estaran demostrando que son inimigas da sociedade, eles saberan a que queren enfrontarse. A deslocalización é unha traizón a todos os pobos do Estado Español.

documental "a crise, o sistema e a soberanía"

2011-10-10T13:33:00.001-07:00

ALUCINANTE: CCOO e UGT consenten en ampliar o artigo 17 ao persoal indefinido

2011-09-20T09:00:00.000-07:00

Despois de meses de bloqueo da negociación do Convenio Colectivo de Contact Center (Telemárketing), o día 20 de setembro asistimos a unha reunión que non podemos cualificar máis que como alucinante. Os sindicatos centralistas defendendo a inclusión das causas de despido no convenio, e a patronal dicindo que no 2010 xa subiron os salarios que levan conxelados dendo o 2009. Como a reunión foi pola tarde só se explicaría esta situación se comeron xuntos (e abusaron do viño e dos "chupitos").

As empresas teiman dende o inicio da negociación en ampliar o artigo 17 (que permite despedir ao persoal temporal sen garantías), para poder despedir tamén ao persoal indefinido e ese foi un dos escollos que alongou a negociación 21 meses. Ademais malias que levamos co salario conxelado dende o ano 2009, din que no ano 2010 xa subiron os salarios, e que hai que partir desa situación ¿?.

Pero se a posición da ACCE é alucinante, aínda o é máis a postura de CCOO/UGT, que esta vez estiveron representados por "profesionais do sindicalismo"" (burócratas sindicais) alleos ao sector de Telemárketing.

Os burócratas pro-empresa dixeron que, dado que a lexislación establece os criterios para despedir ao persoal indefinido, a patronal só ten que propoñer un redactado para o artigo 17 que permita despedir a ese persoal legalmente. Hai pouco fixeron un chamamento á folga xeral contra a reforma laboral, e agora propoñen incluíla no convenio.

Para a CIG o problema non é poder despedir colectivamente sen garantías ao persoal indefinido, senón ampliar as garantías para o persoal temporal. Xa abonda de despedimentos inxustos.

Antes do verán, unha das empresas que forman parte da patronal ACCE, Unísono, presentou un ERE extintivo nun centro de traballo en Vigo. Despois da negociación o ERE transformouse en temporal e rotatorio, demostrando que hai alternativas factibles aos despedimentos incluso nos peores momentos.

A patronal recorre aos despedimentos caprichosamente, como demostra o caso de Unísono en Vigo. Tiran de despedimentos porque é o máis fácil, pero non é máis xusto nin sempre é necesario.

Galiza, 20 de setembro de 2011

IMPORTANTE

2011-07-29T08:22:00.001-07:00

Todas aquelas persoas que se acolleron á baixa voluntaria incentivada teñen que asistir ó seu posto de traballo ata que se lles diga o contrario, xa que hai que agardar a que a Autoridade Laboral resolva o acordo do ERE. Se coñecedes a alguén que estea nesa situación, por favor, avisade. Graciñas.

PREACORDO E COMPROMISO

2011-07-21T14:13:00.001-07:00

Partiamos dun ERE extintivo que ía afectar a 151 persoas, que ían cobrar de indemnización 20 días por ano e un paro dun 70%.

Conseguimos o seguinte:

Un ERE suspensivo que vai afectar a 90 postos de traballo durante 12 meses. Para que non se consuma a prestación por desemprego (lembremos que comeza a consumir no 6º mes), afectará a 180 persoas (90 en cada quenda de 6 meses).

As persoas que teñan contrato suspendido van recibir unha prestación dun 85% (70% INEM+15% EMPRESA), a non ser en períodos de formación que percibirán un 100%. Esa suspensión, que se notificará cun mínimo de 10 días de preaviso, en ningún caso superará 6 meses, pero requerirá dunha dispoñibilidade importante cara a Empresa, tanto para asistir ás formacións (que será cun mínimo dunha semana de preaviso) como para a incorporación ó posto de traballo (que será cun mínimo de tres días de preaviso).

Os criterios a seguir serán os seguintes:

Veranse excluídas aquelas persoas que sexan imprescindibles para a viabilidade dunha campaña (ventas, idiomas, viabilidade do servizo e quendas); a partir de aí, o criterio a seguir será o da antigüidade (de menor a maior), e, en igualdade de condicións, teranse en conta as cargas familiares (no caso de existir unha parella con cargas familiares, estas serán atribuídas só a un dos membros) e tamén ter unha idade superior ós 55 anos. Os criterios para valorar os coordinadores e supervisores están por decidir pola parte da Empresa, pero estarán supervisados pola comisión de seguemento.

Haberá baixas incentivadas con 28 días por ano traballado (prazo: ata o 28 de xuño).

Crearanse dúas comisións de seguemento: unha para regular o ERE e outra para regular as formacións.

Mañá a CIG, como así o decidiu a asemblea de traballadores por maioría (212 votos a favor, 12 en contra, 45 abstencións), firmará un acordo, nestas condicións.

ERE EN UNÍSONO

2011-07-18T15:05:00.000-07:00

Dende que Unísono presentou o ERE, a CIG, asumindo a responsabilidade depositada polos traballadores e traballadoras nas últimas eleccións sindicais, puxémonos en marcha para tratar de frear a continua perda de postos de traballo en Vigo (en detrimento de Chile, Colombia ou Madrid), e para artellar unha alternativa fronte ao despedimento de 151 compañeiros/as indefinidos e os despedimentos en base ao artigo 17 ou fin de obra.

O Convenio Colectivo anula calquera negociación ante as baixadas de volume de traballo ou fin de obra, mentres que nos procesos de despedimentos colectivos do persoal indefinido a lexislación fai obrigatoria unha negociación entre ambas partes; ser indefinido ten máis garantías, por iso sempre insistimos nesa circunstancia.

A Reforma Laboral, e a recente ampliación da mesma por parte do Goberno, facilita enormemente ás empresas os despedimentos vía ERE. Por este motivo, a CIG convocou folgas xerais o 29 de setembro e o 27 de xaneiro. Daquelas augas veñen estes lodos.

Malia que o marco no que negociamos non é favorable, dende a CIG tomamos a iniciativa e mantivemos reunión coa propia empresa, coa Inspección de traballo, coa Xunta de Galicia e trasladamos a situación ao Parlamento Galego.

Semella que contribuímos a encarrilar a negociación, e coa mediación da Inspección de Traballo entramos na parte fundamental do proceso. Unísono di que pode conseguir novas campañas a medio prazo, pero que o persoal actual non dá o perfil. A CIG propón un ERE suspensivo rotatorio (un ERE temporal con compromiso de reincorporación), que se hai saídas, sexan voluntarias e que se cree unha Bolsa de emprego (como a que existiu no Convenio do Metal no seu día) cunha comisión a tres bandas (Inspección, empresa e sindicatos). Así mesmo, solicitamos da Xunta de Galicia que poña en marcha con Unísono cursos de adaptación do persoal para que poda adaptarse ás novas campañas que podan vir.

Durante a suspensión, o persoal cobraría o desemprego e queremos que a empresa pague a diferenza ata o salario de telemárketing.

É unha proposta que ten como obxectivo modificar o ERE para facelo o menos lesivo posible e para garantir que Unísono siga apostando por Vigo.

A negociación está en marcha, pero queda moito por facer, non é o momento de tirar a toalla nin de crear falsas esperanzas. Andamos un treito do camiño, pero este pode tornarse intransitable, o que requiriría do voso apoio e de novas mobilizacións.

Por último dicir que a CIG non asinará ningún acordo que non teña o respaldo do persoal afectado, ese é o noso compromiso.

Vigo, 18 de xullo de 2011

Para reflexionar

2011-07-05T18:30:00.000-07:00

UNÍSONO NON ATOPA A SOLUCIÓN Ó SEU NEGOCIO

2011-07-05T06:13:00.001-07:00

O pasado día 24 a empresa preséntanos un Expediente de Regulación de Emprego, abríndose así, o prazo legal para a negociación que durará ata o 24 de xullo. O 29 mércores, a CIG e o resto de seccións, mantivemos a primeira reunión informativa coa empresa.

Nesta primeira xuntanza UNÍSONO explicou a suposta situación que din que atravesa o centro de Vigo, e moi en termos xerais, o resto de centros do Estado. A motivación do ERE sería organizativa, non económica. Parece ser que en novembro de 2010 tería comezado un período de baixa contratación de clientes, de finalización de campañas e dun cambio de orientación no perfil que buscan nos traballadores e traballadoras do noso centro. O feito de que finalizasen campañas como IBERDROLA, COMUNITEL ou VODAFONE fixeron que houbese un excedente importante de indefinidos con difícil recolocación, ó que se suma a próxima finalización de ORANGE VOZ E DATOS e de VODAFONE PORTABILIDADE. Ademais do excedente de personal xerado por conta e risco da empresa e da evidente falta de plans formativos dentro do que eles chaman “perfil comercial”, aseguran que a capacidade que buscan nestes momentos non é a que nós temos, xa que seica estamos moi acostumados á recepción de chamadas e no presente precisan persoas que teñan “o xen” do comercial (sic). Aseguran que esta situación tamén se está a vivir no resto de centros do Estado e negan cunha rotundidade moi ben planificada a deslocalización do traballo ás súas sucursais latinoamericanas.

Na documentación que nos entrega a empresa, e que na xuntanza aclaramos, xógase cunha serie de baremos que, en principio, lle vai servir á empresa para escoller ás persoas que van entrar na lista de 151 despedidos, a saber: perfil comercial demostrado, calidade, maiores de 55 anos, cargas familiares* e antigüidade (por esa orde). Engaden que os dous primeiros criterios se van aplicar nos últimos 12 meses para que, incluso a xente que estivese de baixa teña opción ó posto de traballo. No caso de que houbese xente que estivese de baixa máis tempo, non sabemos que pretensións teñen.

Legalmente o ERE implica despedimentos con 20 días por ano e cun máximo de 12 mensualidades.

Desde a CIG mantémonos moi escépticos cos datos facilitados pola empresa e é por iso que solicitamos maior documentación para poder contrastar esta situación. Ademais estamos nunha posición moi crítica ante a postura de UNÍSONO debido a que consideramos que as medidas que adoptan son totalmente abusivas, sabemos que están xeradas por propia vontade e que responden a unha clara intención pola súa parte de desmantelamento dos nosos postos de traballo.

Hoxe, máis que nunca, temos que estar unidos, loitar polos nosos dereitos e berrar ben forte e ben claro que estamos totalmente en contra destas prácticas empresariais que só atenden a centralizar o traballo en Madrid, incrementar beneficios, e precarizar o noso sector, sobre todo tendo en conta os enormes beneficios que xerou a empresa nos últimos tempos, dos que fachendean na súa páxina web. Mentres continuamos na fase de contraste de información non desbotamos ningún escenario mobilizador, no caso de que non se atendan as nosas demandas.

----
* lembrade confirmar coa empresa a vosa situación en canto as cargas familiares: modelo 145.

Asemblea Informativa ERE

2011-06-28T16:05:00.000-07:00

Mañá mércores están convocadas asembleas para informarvos sobre a situación actual da empresa. As asembleas comezarán ás 13:00h, ás 14:00h, ás 15:00h e ás 16:00h. É de suma importancia que acudades, para estar ó tanto do que está ocorrendo.
A loita continúa.

Non ao ERE en UNÍSONO (video)

2011-06-26T15:14:00.000-07:00

Despois de aplicar nun mes e medio por tres veces o artigo 17, que implicou o despedimento de 99 persoas, Unísono-Vigo ameaza cun ERE que afectaría a 151 traballadores/as e coa finalización dunha das campañas máis importantes que ten, ORANGE soporte técnico (117 persoas). No último ano, destrúense máis de 600 postos de traballo grazas a unha deslocalización encoberta a países de Latinoamérica como Chile, onde sobre-explotan os nosos compañeiros. NON AO ERE EN UNÍSONO! NON Á DESLOCALIZACIÓN!

dossier de prensa sobre o ERE en UNÍSONO

2011-06-26T10:32:00.000-07:00

Aquí deixamos o dossier de prensa que fomos recadando ata o día de hoxe. Con maior ou menor fortuna todos estes medios, e seguramente algún máis, fixo trascender esta nova. A loita continúa!

Nova na TVG

2011-06-25T12:32:00.001-07:00

QUE É UN ERE?

2011-06-25T07:43:00.001-07:00

O expediente de regulamentación de emprego, ERE, é un procedemento administrativo contemplado na lexislación do estado español mediante a cal unha empresa busca obter autorización administrativa para suspender ou despedir a un importante número de traballadores.

O expediente emprégase para a reduccción da xornada laboral, a suspensión ou a extinción do contrato de traballo.

No procedemento do ERE, solicítase a autorización da Autoridade laboral competente para despedir ou suspender ós traballadores nun marco no cal se garatizan os dereitos dos traballadores.

Quen inicia o ere?
Normalmente é o empresario dunha empresa grande. Tamén poden solicitalo os traballadores a través dos seus representantes legais, cando consideren que o feito de que a empresa non o faga lles poida causar un perxuízo maior.

Circunstancias para tramitar o ERE
A tramitación dun ERE só se pode iniciar se concurren as seguintes circunstancias previstas pola lei:
Desaparición da personalidade xurídica da empresa.
Despido colectivo ou suspensión do contrato por causas económicas, técnicas, organizativas ou da produción, cando o obxectivo sexa mellorar a viabilidade da empresa ou que a viabilidade da empresa sexa imposible.
Suspensión ou extinción do contrato por causas de forza maior, é dicir, circunstancias non previstas que impiden o desenvolvemento normal da actividade como un incendio.

Cal é a causa principal dos ERE?
Un despedimento colectivo, que é cando o despedimento da plantilla e afecta a:
10 traballadores nunha empesa de menos de 100 empregados
o 10% dos traballadores, nunha empresa de 300 ou máis empregados
30 traballadores, nunha empresa de 300 ou máis empregados.

Cal é o procedemtno do ERE?
Ten tres etapas
Período de consulta e diálogo entre traballadores e empresa
Envío do expediente de regulación á Autoridade Laboral
Resolución do expediente por parte da Autoridade Laboral.

Etapa1: período de consultas e diálogo entre traballadores e empresa
O empresario envía un aviso ós traballadores ou ós seus representantes legais para iniciar un período de consulta e diálogo para reducir os efectos da regulamentación de emprego e chegar a un acordo entre as partes (días de indemnización, recolocación, etc.).
Esta negociación non podo ser inferior a 30 días. E, en casos de empresas de menos de 50 traballadores, este período redúcese a 15 días.
Non obstante, se se alcanza un acordo, pódese finalizar a negociación en calquera momento, a non ser que o pacto consista no despido de traballadores. Nese caso, aínda que haxa acordo, é preciso que o período de consultas teña unha duración mínima de 15 días.
Son representantes dos traballadores: o comité de empresa, delegados de persoal dos centros afectados por redución de plantilla e os delegados sindicais que existan na empresa.
Se non existen representantes dos traballadores no centro afectado, os traballadores poderán intervir directamente por medio de 5 representantes como moito.

Etapa2: envío do ERE á Autoridade Laboral
A solicitude do ERE debe ser enviada á Autoridade Laboral competente para obter a autorización de despedir ós traballadores. A solicitude debe ir acompañada de varios documentos como a memoria explicativa das causas e motivos de despedimento colectivo, a documentación que acredita o estado da empresa e o número e funcións dos traballadores afectados.
A Autoridade laboral competente pode ser a Administración Central ou ben as Comunidades Autónomas que recibiron o traspaso das competencias en materia de regulamentación de emprego.

Etapa3: resolución do ERE por parte da Autoridade Laboral

Recepción da solicitude do ERE:
A Autoridade Laboral comprobará que a solicitude do ERE reúna os requerimentos esixidos pola lei, dando 10 días hábiles á empresa para subsanar erros. Se a empresa non o fai, arquivarase o ERE. Ademais, a Autoridade laboral informará á Oficina de Emprego e solicitará un informe a Inspección de Traballo, que disporá de 10 días para o realizar.

Resolución do ERE:
A Autoridade Laboral dispón de 15 días naturais a partir da comunicación da conclusión do período de consultass, para estimar ou desestimar, todo o parte do ERE.
A indemnización nunca poderá serr inferior á establecida como obrigatoria pola lei: 20 días por ano traballado cun máximo de 12 mensualidades. En caso de forza maiora Autoridade Laboral pode acordar que a totalidade ou unha parte da indemnización que corresponda ós traballadores afectados sexa satisfeita polo Fondo de Garantía Salarial.

Actuación unha vez dictada a resolución do ERE:
Actuación da empresa:
Extinguir os contratos de traballo, facendo efectivas as indemnizacións fixadas.
Recurrir contra a resolución dictada no caso de non estar dacordo coa mesma.

Actuación dos traballadores:
En casos nos que se aprobe a redución da xornada, a suspensión ou extinción da relación laboral, o traballador pode:
Recorrer contra a resolución adoptada de non estar dacordo coa mesma.
Solicitar a súa prestación por desemprego.

Unísono pon en marcha un ERE e outro fin de campaña: 268 despedimentos máis.

2011-06-24T08:03:00.000-07:00

Hoxe a empresa ao remate da mobilización contra os despedimentos, fixo entrega da documentación para un ERE que afecta a 151 indefinidos/as abrindo o período de consultas.

Así mesmo na memoria explicativa do mesmo comunican o fin doutra campaña polo que levará ao fin de obra para outras 117 persoas.

En total 268 despedimentos.

Seguiremos informando.

40 DESPIDOS MÁIS…

2011-06-23T03:29:00.000-07:00

O día 10 de xuño, 40 compañeiras e compañeiros máis foron despedidas tras aplicar de novo o artigo 17, polo que pasarán a engrosar a cola do paro o próximo día 26.

Estas compañeiras/os, que desenvolven as súas funcións no SIF, YACOM, POSTVENDA YACOM e POSTVENDA ORANGE súmanse ás 59 despedidas/os de S.T de ORANGE.

Despois de coller chamadas coma máquinas, soportando abusivos controis de calidade, insultos das e dos clientes e sen descansos entre chamadas… Unísono segue despedindo indiscriminadamente.

Mentres sigan as agresións ós nosos postos de traballo, a loita continúa...

ÚNETE Ó COMITÉ DE EMPRESA NOS PAROS CONVOCADOS O DÍA 24 DE XUÑO!

QUENDA MAÑÁ: DE 11H A 12H
QUENDA TARDE: DE 17H A 18H
A efectos legais a folga convócase 24h.

Comité de Empresa de Unísono Vigo

A CIG de novo na rúa, contra a “Reforma da negociación colectiva” e polo noso Convenio !!

2011-06-22T01:52:00.000-07:00

Unha vez escenificada a ruptura da negociación entre (CEOE-CCOO-UGT), o Goberno Central aprobou por Decreto a Reforma da negociación colectiva. Unha vez máis estamos ante decisións de recortes sociais que toman a crise como escusa pero que foron formuladas con antelación á mesma: a “flexiseguridade” foi plantexada pola UE no 2007. Un decretazo que empobrece os Convenios e lles resta eficacia fronte as decisións da empresa.

-Modifica a estrutura da negociación colectiva. Se ata o de agora os Convenios de Empresa non podían empeorar o establecido no Convenio Sectorial (que establecía as condicións laborais mínimas), coa reforma, a negociación na empresa poderá decidir en materias como salarios, horarios ou clasificación profesional, por baixo do Convenio Sectorial. Ademais, a nivel das grandes empresas persegue dar o monopolio da negociación a CCOO e UGT, poñendo trabas á participación do resto de sindicatos.

Tamén a reforma avanza cara a centralización dos convenios sectoriais. Restrínxese a participación dos traballadores/as implicados na toma de decisións, empobrecendo a negociación colectiva.

-Modifica o contido dos Convenios. Tal e como pactaron CEOE-CCOO-UGT previamente, os Convenios recollerán medidas en materia de “flexibilidade salarial” (facilidades de modificación ou recorte salarial unilateral, ou incluso pagos en especies); “flexibilidade horaria” (non confundir con que o persoal poda elixir horarios, será a empresa a que poda modificar a estrutura dos horarios); eliminar límites á mobilidade xeográfica ou eliminar as limitacións á mobilidade funcional.

-Modifica a vixencia. Se ata o de agora cando vencía un Convenio, mantiña a súa vixencia ata que se negociase un novo, agora o Goberno limitou a ultraactividade e estableceu unha arbitraxe.

Por todo isto a CIG saíu de novo a rúa. O pasado 16 de xuño a CIG celebrou unha asemblea nacional de delegados/as en Santiago e posteriormente unha manifestación. As delegadas e delegados da CIG no sector de Telemárketing saímos a rúa para protestar pola situación do noso convenio, e a intención das empresas de recortar salarios e dereitos laborais.

Marcha galega polo emprego

2011-06-19T06:56:00.000-07:00

A sección sindical CIG en UNÍSONO chama a participar nesta iniciativa que implica directamente ás e ós desempregadas.

Os próximos días 29 e 30 sairán comitivas desde todas as comarcas galegas coa pretensión de chegar a pé a Santiago e co fin de protestar polas promesas non cumpridas: e é que, a pesar de que o señor Feijóo aseguraba que o emprego ía aumentar, na realidade as colas do paro están máis cheas que nunca.

A finalidade desta marcha, pois, é protestar polo desemprego pero tamén esixirlle ó señor Feijóo que reverta a situación.

Rematará o día 3 en Compostela onde haberá unha manifestación nacional, á que estades todas e todos convidados.

máis info en:

explicación da Marcha galega polo emprego

Datas e horarios da Marcha

nota aclaratoria

2011-06-19T06:32:00.000-07:00

Compañeiras e compañeiros:

O comité de empresa tiña convocados paros e concentracións para o día 20, co fin de que todos nós puidesemos mostrar o noso rexeitamento ante esta persecución de dereitos laborais básicos que estamos padecendo.

Queremos poñer no voso coñecemento que a empresa, cando recibiu a notificación, deunos o visto e prace... ata que o empezamos a facer público: nese momento, e só nese momento, advírtenos que é ilegal porque o prazo con que llo comunicamos era de UN DÍA MENOS do establecido (4 no canto de 5; é comprensible, claro: igual non lles daba tempo a reclutar a compañeiros e compañeiras de Chile para explotalos por catro cadelas en tan pouco tempo). Mirade, o poder xudicial neste estado, xa todos sabemos quen o fai, como e para quen, e todos temos que ser conscientes de que o xusto non sempre é o legal.

A empresa sabía perfectamente as nosas intencións de paralizar o centro, porque, tristemente motivos non nos faltan, porque esto é un atropelo, porque nin o máis iluso cre que da noite para a mañá sobren 99 persoas, porque eles seguen medrando á nosa costa e porque non lles treme a man á hora de firmar o despedimento dunha mai de familia e deixala na rúa.

Por iso,a CIG, xunto co Comité de empresa, non se dá por vencida, por iso imos volver convocar as mobilizacións, porque nós non imos ser cómplices do grande empresario que fai de nós un pandeiro e porque queremos deixarlles moi claro que coa nosa vida non se xoga, e se xogan, que se preparen.

Temos todas as de ganar.

organízate!

O telemárketing tamén en contra da reforma da negociación colectiva

2011-06-17T05:56:00.000-07:00

Arredor de 1.500 delegados e delegadas da CIG participaron esta mañá nunha multitudinaria asemblea para analizar as consecuencias da reforma da negociación colectiva. Antolín Alcántara, secretario confederal de negociación colectiva, e Suso Seixo, secretario xeral, explicaron os pormenores da reforma e as consecuencias que esta terá para a clase traballadora galega. Ao remate, e tras das intervencións dos asistentes, saíron en manifestación polas rúas compostelás, para reclamar “Unha negociación colectiva ao servizo da clase traballadora”.

Na súa intervención, Alcántara denunciou que a reforma da negociación colectiva vén culminar o proceso de reformas emprendidas polo PSOE a demanda do capital financeiro, que “pretende transferir as rendas salariais ao capital” para incrementar os seus beneficios e seguir especulando. Unha reforma que, denunciou, é o resultado do consenso de CCOO, UGT e a patronal, porque plasma os puntos de acordo aos que chegaran antes da súa aprobación definitiva, vía decreto, polo Consello de Ministros.

O secretario confederal de negociación colectiva advertiu ademais de que, en diante, cambia practicamente todo en materia de negociación: “desaparecen os convenios provinciais, que eran os que estabelecían un mínimo de garantías, fronte os convenios de empresas, que van regular xornada, horarios, vacacións e mesmo clasificación profesional”.

Calquera convenio de empresa, segundo explicou, poderá ser inferior ao provincial ou estatal. Por iso adiantou que a CIG terá que fixarse como obxectivo “intentar paralizar ou limitar os convenio de empresa”, que teñen como único obxectivo desprotexer aínda máis aos traballadores.

A xustificación para introducir esta reforma, dixo, é incrementar a competitividade, pero pola vía de precarizar as condicións laborais e salariais, no canto de facelo pola vía de introducir melloras tecnolóxicas ou de mellorar a calidade.

En todo caso, sinalou que permite convenios galegos, “pero ten que permitilo o convenio estatal, que pode reservar materias” que só se poderán regular a ese nivel. Por iso, anunciou que a CIG intentará que se regulen uniformemente as condicións laborais en Galiza, contando con CCOO e UGT.

Convenios por subsectores

A nova regulación da negociación colectiva tamén permite promover convenios por subsectores ou grupos de empresas e mesmo que se fagan convenios atendendo ao perfil profesional. Como exemplo puxo a posibilidade de que, dentro dunha mesma empresa, os técnicos e administrativos negocien o seu propio convenio e os obreiros outro. Unha situación que “favorece a fragmentación, o corporativismo e a división dos traballadores dentro da mesma empresa” alén da “creación de sindicatos amarelos, moi beneficiosos para a patronal”.

Seccións sindicais

Outro dos aspectos ao que fixo referencia foi á posibilidade de que quen teña maioría dentro dun comité de empresa poida negociar o convenio sen contar co resto dos representantes no mesmo. “Nós sempre entendemos que se debía contar coa participación de todas as centrais sindicais”, sinalou advertindo que para evitar que sexa a CIG quen ostente esa maioría as empresas “estarán interesadas en favorecer que os delegados/as non sexan da CIG e que os comités tampouco”, para evitar o sindicalismo “combativo e de enfrontamento aos intereses empresariais que practica a nosa central sindical”.

A empresa resérvase ademais a decisión respecto de materias como o descolgue do convenio e o descolgue dos incrementos salariais estabelecidos no mesmo, co que desaparece o marco de referencia de salario mínimo.

Culminación do proceso de reformas

Pola súa banda, o secretario xeral, Suso Seixo, fixo un rápido percorrido polas reformas e recortes en dereitos e servizos sociais que se veñen introducindo desde que comezou a crise económica. Todas medidas dirixidas “contra os que non tivemos responsabilidade na crise, mentres a banca, as grandes empresas e os especuladores seguen incrementando os seus beneficios”. Como exemplo puxo a Telefónica, que obtivo uns beneficios de 10.000 millóns de euros e que vén de anunciar un ERE que supón despedir a 8.000 traballadoras e traballadores.

Cuestionou a xustificación que se está a dar para aplicar estas medidas, supostamente para conseguir máis beneficios empresariais para investir en infraestrutura produtiva e crear emprego, cando en realidade “van ir para os mercados financeiros”.

Ante esta situación, o secretario xeral da CIG lembrou que hai dúas vías: ou asumir que isto é o único que se pode facer, tal e como defenden desde o poder, desde institucións como o Banco de España, o BCE, o FMI, ou a UE e desde os grandes medios de comunicación; ou crer, como defende a CIG, que é posíbel aplicar outras políticas alternativas, porque este non é o modelo da clase traballadora, sendo conscientes do difícil contexto no que nos atopamos. “Temos que loitar por outro modelo que garanta un reparto equitativo da riqueza e máis democrático”, dixo.

Alertou ademais de que, malia a dureza das reformas aprobadas até o de agora, iso “non lles chega”. Por iso, “defenden unha política fiscal inxusta, propoñen incrementar os impostos indirectos e a redución dos impostos directos, aproveitándose da situación de debilidade dos traballadores/as para quitarnos dereitos”.

Fronte a isto defendeu o incremento do investimento produtivo público; os investimentos de carácter social; a creación de empresas públicas en sectores estratéxicos, como a enerxía e as telecomunicacións; a creación dunha banca pública, “que non especule co aforro dos cidadáns e que canalice os recursos ás empresas e ás familias”, como vía para reactivar un consumo responsábel e o emprego.

O papel da CIG

Para vencer esta situación, fixo un claro chamamento aos delegados e delegadas asistentes, para reactivar o papel da CIG nas empresas que “farán unha presión enorme para que se asinen convenios de empresa” e subliñou que os traballadores deben saber que para enfrontarse a esta situación “non serve calquera central sindical”, reclamando o papel que a CIG vén desenvolvendo, como único sindicato que realmente loita por preservar e defender os dereitos dos traballadores.

Do mesmo xeito, salientou a necesidade de buscar aliados ante esta difícil situación, “dentro e fóra das nosas fronteiras”. Nese sentido, lembrou a folga xeral convocada en Euskadi e Galiza o 27 de xaneiro polas centrais sindicais nacionalistas e a mobilización do 5 de abril en Madrid. Mobilizacións coas que se demostrou, dixo, “que hai organizacións sindicais que temos presenza, capacidade de mobilización e que estamos dispostas a chegar até as últimas consecuencias para defender os intereses da clase traballadora”.

Responsabilizou da actual situación na que se atopa a clase traballadora tanto ao PSOE como ao PP e a outras organizacións da dereita, por ser quen posibilitaron a aplicación de todas estas reformas e fixo especial mención ao papel de Núñez Feijoo á fronte da Xunta de Galiza, pola súa inacción e porque desde que chegou o PP ao goberno de Galiza, hai dous anos, perdéronse 100.000 postos de traballo.

Tampouco esqueceu ao 40% de desempregados/as que xa non teñen ningún ingreso porque esgotaron as súas prestacións e ao cada vez maior número de familias que teñen a todos os seus membros no paro. Neste sentido, fixo un chamamento á solidariedade e a sumarse ás mobilizacións que comezarán o 29 de xuño, coa Marcha galega polo emprego. Mobilizacións que rematarán o 3 de xullo, cunha manifestación nacional en Santiago de Compostela.

(texto tirado de: http://www.galizacig.com/avantar/novas/16-6-2011/delegadosas-da-cig-percorren-as-ruas-de-compostela-para-amosar-a-sua-oposicion-a-ref)

40 máis

2011-06-10T05:30:00.000-07:00

‎
40 despedimentos máis en nivel 1-orange.

Con que pouca vergonza actúan estes empresarios que só miran polo seu peto; mentres eles se seguen a enriquecer a nós precarízannos aínda máis. A CIG está, máis que nunca, coas traballadoras e traballadores. Seguiremos loitando polo que é, por dereito, noso!

queremos convenio xa, e querémolo aquí

2011-06-08T05:32:00.000-07:00

Tal e como mostran as imaxes, delegadas e delegados de telemárketing e de banca (a federación á que nós pertencemos) tiveron dúas ocasións para ee manifestaren en contra da paralización do convenio, lembremos: 18 meses de conxelación salarial e 18 meses onde a patronal segue sen dar o brazo a torcer pedindo cousas tan abusivas como que o artigo 17 afecte tamén a indefinidos. E non llo imos permitir. Dixémosllo ben claro o día 1 de xuño na Coruña, en Sykes, Eurocen e Attento, e dixémosllo tamén, o día 8, en Unísono e Bosch.

90% DE DIGNIDADE

2011-06-06T07:24:00.000-07:00

Apoio masivo nos paros convocados polo Comité de Empresa.

O pasado día 27 convocouse, dende o Comité, unha xornada de folga, co motivo dos despedimentos dos últimos tempos. Coa unidade de tódalas traballadoras/es conseguimos demostrarlle á empresa o noso rexeitamento ante a súa política sistemática de destrución de emprego.

Dende o Comité de Empresa valoramos positivamente que a grande maioría das traballadoras/es de Unísono saíran á rúa defender os dereitos de todas/os. Ese venres foi un claro exemplo de solidariedade e dignidade. A empresa xa sabe que todas unidas/os somos máis fortes e que seguiremos loitando pola defensa dos nosos postos de traballo.

A folga foi máis alá das portas da nosa empresa e chegou a repercutir na prensa, televisión e radio. Medios como La Voz de Galicia, Faro de Vigo ou Atlántico Diario fixeron pública a situación que actualmente estamos a padecer.

Mentres non nos demostren o contrario, seguiremos berrando o mesmo:

QUE NON NOS VACILEN, O TRABALLO VAI PARA CHILE !!

TRAS O ÉXITO DA MOBILIZACIÓN DE DELEGADOS...

2011-05-23T05:22:00.000-07:00

Convocamos paros e concentracións diante do posto de traballo

e...

...POR QUE PEDIMOS O VOSO APOIO?

Isto é só o comezo.

1. Porque UNÍSONO despediu a máis de 70 compañeiros nun mes e a máis de 300 nun ano.

2. Porque UNÍSONO aproveita o artigo 17 para botarnos por catro cadelas.

3. Porque UNÍSONO sanciona indiscriminadamente e esixe calidade sen formación.

4. Porque UNÍSONO deslocaliza para obter máis beneficios.

5. Porque UNÍSONO suspende de emprego e soldo por minutos de retraso.

6. Porque UNÍSONO non paga os incentivos.

PRECISAS ALGÚN MOTIVO MÁIS?

Porque o seguinte despedido podes ser ti!

VENRES, 27 DE MAIO

11:00h. A 12:00h.
17:00h. A 18.00h.

Comité de empresa.

2011-05-20T05:07:00.000-07:00

Aínda que, por cuestións alleas a nós, non foi posible que as compañeiras e compañeiros puidesen participar na concentración, esta foi un éxito, así o demostra este video:

Non estamos dispostos a que sigan a despedir xente, amparándose no artigo 17, sen que haxa resposta por parte da CIG. Denunciamos que no último ano foron desdepedidas 300 persoas, alegan que o volume de chamadas baixa, mentres, por un lado Unísono está a piques e abrir un novo centro en Colombia e Orange ten cifras históricas de contratación de clientes. Isto é un atropelo, e nós non o imos consentir neste marco onde levamos, ademais, 18 meses co convenio paralizado.

FÓRA O ARTIGO 17!

2011-05-18T05:06:00.000-07:00

Por circunstancias alleas a nós, vémonos obrigados/as a desconvocar os paros programados para o venres. A concentración segue en pé pero non vos podedes desconectar, porque podedes ser sancionados/as. Animámosvos, non obstante, a que participedes nos descansos e incluso, se podedes, que vaiades ás concentracións da quenda contraria á que teñades.

O COMITÉ DE EMPRESA INFORMA:

2011-05-16T05:02:00.000-07:00

En maio do 2010, Unísono contaba con 1000 traballadores; hoxe, un ano despois somos 700 escasos, e seguimos baixando.

Tan só no que levamos de ano perdemos unha das campañas máis importantes de Unísono, Vodafone.

Agora vemos como estamos perdendo case ó único cliente de Unísono Vigo na actualidade, Orange.

No último trimestre destruíronse 130 postos de traballo por unha suposta baixada do volume de chamadas (art. 17) e pola desaparición de campañas.

Lamentablemente sabemos que isto non remata aquí: a patronal propón que no novo convenio, o art. 17 afecte tamén ós indefinidos, podendo, desta maneira, mandalos á cola do paro con 8 días por ano traballado

Ímolo permitir?

Asemblea informativa 18 maio 2011

14:00 a 17:00 en Vigo 2

Non agardes a que sexa a túa quenda!

Participa nos paros do 20 maio 2011

11:00 a 12:00

17:00 a 18:00

Máis que nunca únete ó Comité de Empresa

Fotos paros 4 de abril

2011-04-07T04:06:00.000-07:00

Convenio: Dar a batalla ou tomar café...

2011-03-21T06:12:00.001-07:00

Sabiamos que a negociación do Convenio Colectivo de Contact Center ía ser tremendamente difícil; xa a aplicación do Convenio anterior foi conflitiva, negándose a patronal a aplicar a suba salarial pactada. O que pasa hoxe era de agardar, pero da podremia do Convenio Estatal non é responsable só a patronal.

Durante 15 meses a negociación do Convenio foi bloqueada pola patronal, e nós insistimos, por pasiva e por activa, na necesidade de mobilizar ao sector, e convocamos folgas, asembleas e mobilizacións.

Non é a primeira vez que a patronal opta por unha posición pechada, a diferenza estriba en que, noutros procesos de negociación, os sindicatos fomos capaces de aparcar as diferenzas e traballar de xeito unitario, para impulsar mobilizacións coa forza suficiente para mover ás empresas.

A día de hoxe hai convocados paros de 15 minutos, unha proposta que non mancará ás empresas e que, polo tanto, terán pouca incidencia para conseguir mover á patronal. Ao que hai que engadir que algunha Sección Sindical dalgún sindicato convocante, nunha empresa en Galiza xa anunciou que non apoiará os paros.

Un paro ou unha folga é unha xornada reivindicativa e de loita, non 15 minutos para tomar café ou botar un “pitillo”.

A CIG non apoia estes paros, convocados para non se sabe que, xa que os atrasos que din que reclaman non son os que están pedindo na mesa. Nos vindeiros días continuaremos coas mobilizacións propias.

A patronal só quere ampliar a temporalidade e abaratar os despedimentos: o 27 todos/as á FOLGA

2011-01-19T00:53:00.001-08:00

Na reunión do día 17 de xaneiro, á que non puidemos asistir por quedar en terra os avións, a patronal que representa a todas as empresas de telemárketing, anunciou que o vindeiro 4 de febreiro presentará unha proposta para modificar os artigos 17 e 18 do Convenio, que sen esta modificación non será posible chegar a un acordo.

Despois dun ano coa negociación aberta, que non un ano negociando, veñen con que hai que ampliar a temporalidade e axilizar os despedimentos.

A reforma laboral avanzaba en equiparar temporais e fixos en canto a indemnizacións e facilidades para o despedimento, agora a patronal quere facer o mesmo no Convenio.

No telemárketing está claro que non hai problemas para facer contratos temporais de longa duración, nin para despedir polos motivos máis inxustos en calquera momento, o da patronal é unha pura provocación.

O mesmo que acontece coa reforma das pensións , CCOO e UGT continúan sentados para falar de recortes sen mobilizarse.

Se a alguén afecta a reforma das pensións é a nós: vivimos hoxe na precariedade e a padeceremos tamén no futuro. Esixir 41 anos cotizados para xubilarse con 65 implica cotizar de xeito ininterrompido dende os 24 anos, algo imposible co modelo actual de temporalidade/paro/temporalidade. Incrementar a cotización para ter dereito a pensión ata os 25 anos tamén nos afecta polo mesmo motivo.

Non cabe continuar sen mobilizarse, por iso o 27 de xaneiro a FOLGA XERAL convocada pola CIG debe ter un seguimento masivo no noso sector, está en xogo o noso futuro inmediato: o convenio, pero tamén o noso futuro a longo prazo.

Asembleas sector telemárketing

2011-01-18T03:32:00.000-08:00

A CIG convoca asembleas no sector telemárketing cara a FOLGA XERAL e para informar da situación da negociación do Convenio.

En Vigo as asembleas estan convocadas para o vindeiro día 20 de xaneiro ás 12:30 horas e as 20:00 horas no local da CIG na rúa Gregorio Espino, 47.

Un ano sen convenio e anos de precariedade

2011-01-12T04:08:00.001-08:00

Descarga, imprime, espalla e protesta.

A patronal saca o látego de 9 puntas e a navalla de 7 estralos

2010-12-13T05:01:00.001-08:00

A patronal falou por fin das súas propostas para pechar un acordo o máis rápido posible. En materia de salarios propoñen que non subilos a principio de cada ano, que se faga a posteriorí, mentres en materia de contratación queren simplificar os despedimentos de fixos e temporais.

Salarios, proposta patronal

Din que non están dispostos a volver a firmar unha suba salarial ligada ao IPC previsto. Propoñen, en consonancia, que os salarios non suban a principio de ano, que se paguen atrasos unha vez vencido o ano cando se coñeza o IPC definitivo do ano anterior.

A modo de exemplo, a suba correspondente ao 2011 cobraríase como atrasos no 2012 cando se publicase o IPC definitivo.

Proposta CIG: Defendemos unha suba lineal de 540 euros para todo o persoal correspondente ao ano 2010.

Contratación, proposta patronal

Subir indefinidos ao 50%. A cambio, o despedimento do persoal temporal e indefinido podería realizarse, en aplicación do artigo 17, coa única proba documental dun certificado do cliente da baixada do volume de traballo.

Con ese novo artigo o despedimento do persoal indefinido sería a través dun ERE, que sería solicitado á Comisión Paritaria para que elaborase un informe vinculante para todos os Comités de todas as empresas.

Se o número de despedimentos non chegase ao preciso para considerarse colectivo, estes terían a consideración de obxectivos; ACCE di que está disposta a falar dunha indemnización de 20-25 días por ano traballado.

Pero non queda aí, xa que en relación aos contratos temporais queren ampliar os novos contratos por Obra que se realicen ata os 4 anos (coa reforma laboral os novos contratos considéranse indefinidos aos 3 anos).

Queren modificar o artigo 18, para que en caso de subrogación, a obriga de contratar ao persoal que viña prestando servizo na anterior empresa de telemárketing baixe ao 50%.

Proposta CIG: Como no resto de sectores os contratos serán indefinidos, regulando e limitando as distintas modalidades temporais atendendo á causalidade. Despois dos anos transcorridos, o telemárketing é un sector consolidado e non caben máis excepcións a favor das empresas.

Para rematar, despois de “estirarse” nas súas propostas, queren estirar a negociación, aprazando a seguinte reunión para o vindeiro 17 de xaneiro.

Convenio de transición?, Non grazas

2010-11-28T01:20:00.001-08:00

Na negociación do convenio colectivo están en xogo as nosas condicións laborais, a suba salarial, horarios e xornada, permisos, saúde laboral ou o réxime de despedimentos, algo, por outra banda, desgraciadamente habitual no sector.

Levamos 11 meses coa mesa de negociación do Convenio Colectivo de Telemárketing aberta, sen ningún tipo de avances debido á posición pechada e oportunista da patronal.

Durante este tempo, malia a nosa predisposición, non houbo unha soa medida de presión conxunta. CCOO e UGT nin contestaron ás nosas propostas de unidade de acción.

Así mesmo, a negociación deste Convenio vén precedida dun Acordo Estatal de Negociación Colectiva, asinado entre a CEOE (na que están integradas as empresas de telemárketing), CCOO e UGT, para topar a suba salarial no 1% nos convenios que se negocian este ano.

Con este panorama, o 25 de novembro tivo lugar unha reunión en Madrid entre as cúpulas da CEOE, CCOO e UGT para “intervir” na negociación de 170 convenios bloqueados, supoñemos que entre eles está o noso.

Ao fío disto, o día 26 de novembro na mesa negociadora do Convenio de Telemárketing, CCOO e UGT propuxeron un “convenio de transición por dous anos”, é dicir que nos suban os salarios un 1% e os resto todo siga igual de mal.

Dende a CIG anunciamos que hai que falar da suba salarial, non dun miserable 1% dende logo, e sobre todo da contratación. Así se quedou para o mes de decembro.

En definitiva estamos ante unha mostra evidente da podremia do marco estatal de negociación, un marco favorable á patronal e negativo para os traballadores e traballadoras, que nos reafirma na nosa proposta de Convenio Galego para os Centros de Chamadas.

Exito dos paros no sector

2010-10-25T11:44:00.001-07:00

Galiza foi a nación do Estado onde os paros convocados a nivel estatal pola situación da negociación do Convenio do sector de telemárketing tiveron un maior seguimento, despois de que a CIG decidira sumarse á convocatoria, que non foi apoiada nin por CCOO, nin por UGT.

O paro dunha hora, na quenda de mañá das 12 ás 13 horas e na quenda de tarde das 18 ás 19 horas, foi un éxito en toda Galiza, nomeadamente nas cidades da Coruña e Vigo que concentran o maior número de empresas.

A folga afectou a todas as campañas que atenden estas subcontratas e durante a mesma os teleoperadores e teleoperadoras concentráronse diante dos respectivos centros de chamadas en demanda dun convenio digno. Os paros non foron apoiados nin por CCOO, nin por UGT.

Negociación bloqueada

A negociación do convenio de telemárketing está bloqueada dende principio de ano debido a actitude prepotente da patronal que, inicialmente defendeu atrasala até que estivera aprobada a reforma laboral para aplicala no Convenio Colectivo e que agora pretende atrasala novamente á espera da reforma da negociación colectiva.

Xa antes do verán a CIG trasladou aos distintos Comités de Empresa a proposta de realizar mobilizacións. Porén, as diferenzas sindicais impediron daquela chegar a un acordo despois de que a maior parte das outras centrais que, segundo CIG-Telemárketing, “actúan como franquicias” anunciaran que tiñan que pedir autorización ás súas direccións de Madrid.

Neste momento a CIG estuda un calendario de novas mobilizacións no sector para evitar que a patronal tire beneficio das reformas antisociais do goberno central do PSOE.

Precariedade arrastrada desde o anterior convenio e deslocalización

Desde o sector de telemárketing do sindicato nacionalista lembran que durante o período 2007-2009, no que se aplicou o anterior convenio que mantivo as precarias condicións laborais, as empresas reduciron no Estado 1.741 postos de traballo.

No mesmo período as mesmas empresas crearon 15.052 postos de traballo en terceiros países, froito dunha deslocalización sen límites coa complicidade dos gobernos autonómico, central e da AEPD (Axencia Estatal de Protección de Datos).

Diante desta situación, para a CIG-telemárketing queda claro que a precariedade e os baixos salarios non son a receita fronte a deslocalización.

A CIG avaliará a convocatoria dunha nova folga xeral se o goberno persiste na reforma das pensións e non retira a laboral

2010-10-21T23:35:00.001-07:00

A CIG anunciou esta mañá, en rolda de prensa, a convocatoria de mobilizacións no mes de novembro, para exixir novamente a retirada da reforma laboral, para demandar que non se leve a cabo a reforma das pensións e para demandar medidas estruturais dirixidas a mudar o actual modelo económico neoliberal, por outro máis xusto e sustentábel. O día 3 de novembro, está convocada unha asemblea nacional de delegados, que rematará cunha manifestación en Compostela, e o día 18 celebraranse manifestacións en todas as cidades, entre as 19:00 e as 20:00 horas.

Suso Seixo, secretario xeral, adiantou que se iniciarán contactos con CCOO e UGT para trasladarlles a disposición da CIG de continuar coas mobilizacións e mesmo convocar unha folga xeral e para coñecer a súa opinión ao respecto. Neste sentido, sinalou que a central sindical analizará, en función da resposta ás mobilizacións convocadas en novembro e dos resultados das conversas con estas organizacións sindicais esa posibilidade, porque dixo “é algo moi serio, que non se pode facer á lixeira”.

En todo caso, advertiu que “se a situación se mantén e se a reforma das pensións se leva a cabo, tal e como se prevé, en decembro, ou a principios de ano, a CIG avaliará, tendo en conta todas estas variábeis, a convocatoria dunha folga xeral mesmo de forma unilateral”.

De facer esa convocatoria en Galiza sen contar con CCOO e UGT, a CIG valoraría a posibilidade de facela coincidir con folgas xerais noutras nacións do estado.

Para Suso Seixo, o éxito da recente folga xeral demostrou que, malia o contexto no que se convocaba, mesmo cando xa estaba aprobada a reforma laboral, os traballadores e traballadoras depositaron a súa confianza nas centrais sindicais, que teñen agora que estar á altura das circunstancias e seguir dando resposta aos ataques do goberno contra a clase traballadora. “Facer outra cousa, sería xerar a frustración e traizoar esa confianza”.

Reforma laboral

O secretario xeral da CIG cuestionou a “actitude intransixente” do goberno e a súa falta de sensibilidade coas demandas sociais. Actitude que contrasta coa submisión que amosa diante das exixencias do capital financeiro canalizadas a través do FMI, do que lembrou que acaba de pedirlle ao estado español que flexibilice aínda máis o mercado laboral e un Plan B, por se fora necesario aplicar novos recortes. “Non nos sorprende este escenario, por iso cremos que fronte á imposición dun modelo económico e social como este hai que continuar coas mobilizacións”.

Seixo tamén sinalou que coa remodelación do goberno non se van mudar as políticas, afirmando que “non dependen de Valeriano Gómez –o novo Ministro de Traballo-, son políticas do goberno e do partido que o sustenta”.

Aínda así, anunciou que a CIG solicitará unha entrevista co novo Ministro, para manifestar “a oposición da central sindical ás reformas e a nosa firme disposición a seguir mobilizándonos”. Unha entrevista que entende que tería que ser o propio Ministro quen a solicitara, “para coñecer a opinión das centrais sindicais máis representativas, e a CIG é unha delas”

Reforma das pensións

Respecto da reforma das pensións, coa que se pretende atrasar a idade de xubilación e aumentar o período de cálculo denunciou que desde os diferentes medios estase a dar voz a aqueles que afirman que se trata dunha reforma inevitábel para xustificala. Como exemplo puxo as informacións nas que se recolle a opinión do Grupo dos 100 economistas, que dependen dunha Fundación controlada pola Banca e as grandes empresas multinacionais españolas.

Fronte a isto, demandou tanto aos medios de comunicación como ao propio goberno que se fagan eco tamén daqueles outros estudos independentes que demostran que está garantida a sostibilidade da caixa da Seguridade Social e, polo tanto, o sistema de pensións.

Mobilizacións en Francia

Respecto do éxito que están a ter as mobilizacións en Francia, Suso Seixo afirmou que están plenamente xustificadas e que dado o calado das reformas que xa se nos impuxeron e as que se nos pretenden impor en breve “teríamos aquí moitos máis motivos para mobilizarnos que os franceses”.

Neste sentido alertou de que o espírito que subxace en todas as reformas é precarizar máis o mercado laboral, favorecer o incremento da xornada e seguir rebaixando os salarios, algo que posibilita a reforma laboral ao permitir o descolgue dos convenios para incumprir as cláusulas de revisión salarial. Todo isto, co obxectivo último de reducir até nun 25% os salarios no ámbito do estado, para favorecer as exportacións, abaratando os prezos dos produtos, a custo dos traballadores.”

Información para o persoal despedido

2010-09-21T11:37:00.000-07:00

Unísono CRM anunciou 34 despedimentos nas campañas de Vodafone e Iberdrola en Vigo. En primeiro lugar queremos transmitirvos a todas/os afectadas/os unhas normas mínimas de actuación ante o despedimento:

• Non asinedes ningún tipo de documento, se o facedes poñede “Recibín non conforme”, data e hora. Esixide unha copia de todo o que asinedes.

• Se a empresa pon problemas reclama a presenza dun delegado/a sindical na reunión.

• Non asines baixo ningún concepto o finiquito mentres non sexa revisado individualmente no sindicato. Se o asinades renunciades a calquera dereito se estivera mal calculado, ou incluso a posibilidade de demandar.

• Conserva todas as nóminas, contratos e demais documentos.

• Consulta a posibilidade de demandar a empresa xudicialmente para tratar de conseguir a readmisión ou no seu defecto a máxima indemnización posible (45 días por ano traballado).

• Dende o despedimento hai 20 días para poder presentar demanda, polo que debedes poñervos en contacto co sindicato canto antes.

Informamos de todo isto porque son principios xerais, pero ademais despois dunha análise pormenorizada da documentación facilitada por Unísono (e da que conseguimos pola nosa conta), pensamos que hai irregularidades nos despedimentos que poderían permitir reclamar xudicialmente. O artigo 17 do Convenio de Telemárketing facilita e abarata os despedimentos, pero cremos que con todo cabe a posibilidade de demanda xudicial.

Os despedimentos son individuais e polo tanto as demandas son individuais, a Lei non permite que sexamos os sindicatos nin os Comités os que denunciemos no xulgados. Animamos ao persoal a demandar, non facelo pode supoñer renunciar á indemnización correspondente como xa sucedeu noutros casos e se finalmente vos obrigan a marchar, tedes dereito a facelo na mellor das condicións.

Por outra parte, queremos denunciar publicamente que Unisono Chile ofertou 120 postos de traballo para “Soporte Técnico”, 60 para a quenda de día e outros 60 para a quenda de noite (cando aquí é de día alí é de noite). Estamos pois ante un caso evidente de deslocalización e pensamos que estes despedimentos actuais son un inicio. Estamos investigando xa que pensamos que o de Unisono Chile non é o único caso.

A CIG aposta por mobilizarse na defensa dos postos de traballo e recomendamos ao persoal afectado que defenda os seus dereitos, que non ceda de balde ás pretensións da empresa.

LEMBRA O 29 DE SETEMBRO FOLGA XERAL.

O 29 de setembro paremos telemárketing (II)

2010-09-21T11:32:00.001-07:00

Con esta reforma amplían a posibilidade dos despedimentos por faltas xustificadas pero intermitentes, que acaden o 20 % das xornadas hábiles en dous meses consecutivos, ou o 25 % en catro meses descontinuos dentro dun período de doce meses, incluídas baixas por enfermidade, permisos por morte dun familiar ou por coller días de mudanza. Tratan en definitiva que traballemos enfermos ata a extenuación e que renunciemos aos dereitos adquiridos.

Hai que insistir que na práctica esta Reforma transforma ao persoal indefinido en temporal; como exemplo, a indemnización de despedimento que pagarán as empresas en despedimentos obxectivos será de 12 días (os outros 8 os pagará o FOGASA), nos contratos temporais a indemnización será de 12 días (no 2015). Se costa o mesmo despedir a un fixo que a un temporal ¿hai traballos fixos?, evidentemente non.

Pero coa Reforma, ¿perder o posto de traballo é o peor que nos pode pasar? A reforma laboral tamén establece medidas para conseguir máis “flexibilidade” para as empresas, é dicir, maior precariedade laboral.

Igual que nos despedimentos amplían as vías polas que as empresas poderán modificar condicións substanciais por causas técnicas, económicas ou organizativas, poderán impoñer mobilidade xeográfica; deixar de pagar os salarios pactados nos convenios; ou poderán reducirnos a xornada laboral (as horas de traballo que figuran nos contratos) co correspondente recorte nos salarios.

Falan que a reforma laboral pon coto á temporalidade; totalmente falso: os contratos temporais realizados con anterioridade a aprobación da reforma non se verán afectados. Ademais amplían o campo de actuación das Empresas de Traballo Temporal creando a figura de axentes privados de colocación.

Por outra parte e máis alá da subvención do despedimento con cargo ao FOGASA, a reforma insiste na liña de bonificar a contratación por parte das empresas.

Moitos traballadores e traballadoras non son conscientes do alcance da contrarreforma. Estamos ante a implantación definitiva dun novo modelo baseado na precariedade máis absoluta no que as empresas poderán prescindir unilateralmente dos dereitos laborais, despedirnos, deixar de aplicar os convenios, decidir trasladarnos ou recortarnos a xornada e o salario.

Por todo isto, o 29 DE SETEMBRO, ¡¡¡ FOLGA XERAL !!!

O 29 de setembro paremos telemárketing (I)

2010-09-21T11:30:00.001-07:00

Se algo sabemos no telemárketing é que despedir é doado e barato, que os con-tratos temporais son a norma, que as empresas teñen toda a flexibilidade do mundo e malia todo isto nos últimos cinco anos crearon emprego, pero fóra do Estado froito da deslocalización. Abaratar e recortar dereitos non garante a creación de emprego, garante precariedade laboral.

O goberno central impón unha reforma laboral que aposta por desprotexer totalmente aos traballadores/as, unha reforma que abarata, facilita e amplía as causas de despedi-mentos, amplía o uso de ETT, e permite as empresas recortar salarios ou reducir xornadas.
A crise é unha escusa para impoñer un novo modelo económico, social e laboral. Por iso a CIG convocou FOLGA XERAL o 29 de setembro.

Co actual Convenio os despedimentos son doados e baratos para as empresas e agora, coa reforma, queren facilitalo aínda máis, abaratalo e subvencionar ade-mais con diñeiro público parte das indemnizacións de despido e se amplían as causas dos despedimentos obxectivos.

As empresas poderán alegar previsión de perdas para proceder ao despedimento individual ou colectivo cunha indemnización de 20 días por ano ata un máximo de 12 mensualidades.

Tamén será causa de despido obxectivo a diminución de ingresos con independencia de que as Empresas obteñan beneficios no mesmo exercicio.

O despedimento por causas obxectivas por razóns técnicas, organizativas, económicas e de produción, tamén se flexibilizan, polo que a implantación de novos elementos técnicos ou a substitución de máquinas permite o despido.

Poderán despedirnos con máis facilidade polo simple feito de faltar ao traballo por causas xustificadas, ben sexa por estar de baixa, pedir días por ter un familiar enfermo ou coller dous días de mudanza. Unha sen razón que pretende que traballemos ata rebentar e que renunciemos sen máis aos dereitos adquiridos.

Así mesmo, a reforma afecta noutras cuestións máis alá dos despedimentos que explicaremos posteriormente. Estamos vendidos, a democracia esvaeceuse dos postos de traballo, vivimos na ditadura dos empresarios. As reformas conformarán a estrutura dun novo modelo laboral, económico e social onde temos as de perder.

Os traballadores e traballadoras do sector do telemárketing temos motivos de abondo para ir á FOLGA sen que houbera reforma laboral, pero agora que pretenden impoñernos máis precariedade, máis despedimentos e recortes salariais debemos unir as nosas forzas e participar activamente na FOLGA XERAL DO 29 DE SETEMBRO. Indo a folga, asistindo aos piquetes e as mobilizacións convocadas. Paremos as empresas e aos seus gobernos-monicreques.

A CIG presenta a convocatoria de Folga Xeral

2010-09-07T13:57:00.001-07:00

A CIG presentou esta mañá, na consellaría de Traballo e Benestar a convocatoria de folga xeral, que afectará a todas as actividades desempeñadas polos traballadores e traballadoras de empresas privadas e do sector público, con vínculo funcionarial, estatutario ou laboral en Galiza. A folga comezará ás 0:00 horas do día 29 de setembro e rematará ás 24:00 horas. Con esta convocatoria a central sindical pretende dar unha resposta contundente e frear as agresións das que está sendo obxecto a maioría social, a clase traballadora, e que van máis alá da reforma laboral, e abrir un debate social sobre cara que modelo de organización económica, social e política debemos camiñar.

“Estamos diante dunha convocatoria de folga xeral que transcende o que é estritamente a reforma laboral que está hoxe a debate”, explicaba o secretario xeral da CIG, Suso Seixo, tras facer entrega no rexistro da consellaría de Traballo, da convocatoria de folga xeral.

Para a CIG, estamos ante un debate de modelo de organización social e económica e, “ou camiñamos cara formas de organización social máis xustas, solidarias e democráticas ou, se non conseguimos parar estas reformas, vaise reforzar aínda máis este modelo inxusto e antidemocrático, na medida en que se concentra máis poder económico e político en poucas mans e, finalmente, quen termina decidindo as políticas económicas e sociais son o FMI e outras institucións sobre as que non hai nin control popular, nin control institucional”.

Por iso, o secretario xeral da CIG alertou da gravidade que ten que se centre todo o debate sobre a crise económica e a saída da mesma arredor da reforma laboral “cando nada teñen que ver as supostas rixideces do mercado laboral e o custo de despedimento, nin mesmo a estrutura da negociación colectiva” nin coas causas nin coa súa solución.

De feito, denunciou que se está a utilizar a crise como “desculpa” para recortar dereitos laborais e “detraer recursos dos traballadores e mesmo do erario público, para a patronal”, afondando moito máis “neste modelo neoliberal para que aqueles que provocaron a crise manteñan as súas ganancias”.

A reforma laboral

Respecto da reforma laboral, que será ratificada o próximo día 9 de setembro no Congreso dos Deputados, logo de introducirse as modificacións aprobadas no Senado, o secretario xeral lembrou que neste trámite “se empeorou o Real Decreto de reforma laboral presentado inicialmente”, o que implica “confirmar as nosas peores expectativas”, dixo.

Así salientou, entre as medidas que contempla a reforma, o abaratamento do despedimento, a ampliación das causas de despedimento por causas obxectivas; a ampliación do contrato de formación até os 24 anos que “é facilitar man de obra barata aos empresarios”; a privatización da intermediación no mercado laboral, dando entrada ás axencias privadas de contratación con ánimo de lucro abríndoas a sectores que até o de agora lles estaban vetados, mesmo os de alto risco como o da construción, ou na administración pública...

As reformas pendentes

Para a CIG, con esta folga xeral, tamén se queren denunciar e frear reformas pendentes, “que xa están enriba da mesa” como a das pensións, coa que se pretende, entre outras cousas, ampliar a idade de xubilación, ou a da negociación colectiva. Reformas que tamén se tratan de introducir utilizando como pretexto a crise económica e que “tampouco teñen nada que ver con ela”, asegurou.

Coa reforma da negociación colectiva, o secretario xeral da CIG advertiu que se busca unha maior centralización, o que, na práctica “vai supor maior burocratizacion, illar ás/aos traballadoras/es do debate a medio e longo prazo e deixar o camiño aberto para precarizar aínda máis as súas condicións laborais e o mercado laboral no seu conxunto”.

Xornada de folga

Na convocatoria presentada pola CIG, que dará comezo ás 00:00 horas do 29 de setembro até as 24:00 horas dese mesmo día, estabelécense algunhas excepcións referidas ás empresas, administracións e organismos que teñan varias quendas de traballo. Nese caso o comezo da folga realizarase na primeira quenda, aínda que comece antes das 00:00 horas e finalizará unha vez rematada a última quenda, aínda que vaia máis alá das 24:00 horas.

Alén diso, e para garantir a cobertura informativa do paro, nas empresas xornalísticas e medios de comunicación, a folga convocada terá lugar no período comprendido entre as 07:00 horas do día 28 de setembro e as 24:00 horas do día 29 de setembro, correspondendo aos traballadores /as de cada centro de traballo a determinación do horario de folga do período de referencia.

Á CONSELLARÍA DE TRABALLO E BENESTAR DA XUNTA DE GALIZA

C/C: Consellaría de Facenda, Delegación do Goberno de España en Galiza, Federación Galega de Municipios e Provincias, Confederación de Empresarios de Galicia

Asunto: Convocatoria de folga xeral

XESÚS ELADIO SEIXO FERNÁNDEZ, en representación do sindicato CONFEDERACIÓN INTERSINDICAL GALEGA (CIG), do cal é secretario xeral, con domicilio para efectos de notificacións na rúa Miguel Ferro Caaveiro, 10; 15707 Santiago de Compostela; EXPÓN:

I. A Executiva Confederal da CIG decidiu convocar unha FOLGA XERAL que afectará a todas as actividades desempeñadas polos traballadores e traballadoras de empresas privadas e polos empregados e empregadas do sector público, con vínculo funcionarial, estatutario ou laboral, no ámbito territorial da Comunidade Autónoma de Galiza.

II. Mediante este escrito, e consoante ao disposto nos artigos 3 e 4 do Real Decreto-lei 17/1977, do 4 de marzo, a CIG procede a comunicar formalmente a decisión adoptada, coa advertencia de que a folga afecta a empresas, administracións e organismos que prestan actividades e servizos esenciais para a comunidade.

III. A folga convocada terá lugar o día 29 de setembro de 2010, comezando ás 00:00 horas e rematando ás 24:00 horas, coas salvidades que se indican a continuación:

– Nas empresas, administracións e organismos que teñan varias quendas de traballo, o comezo da folga xeral realizarase na primeira quenda, aínda que comece antes das 00:00 horas do día 29 de setembro de 2010, e finalizará unha vez rematada a última quenda, aínda que se prolongue máis alá das 24:00 horas do día de referencia.

– Para garantir a cobertura informativa do paro, nas empresas do sector do xornalismo e medios de comunicación, a folga convocada terá lugar no período comprendido entre as 07:00 horas do día 28 de setembro de 2010 e as 24:00 horas do día 29 de setembro de 2010, correspondendo aos traballadores e traballadoras de cada centro de traballo a determinación do horario de folga dentro do período de referencia.

IV. O obxectivo da folga xeral é mostrar o rexeitamento da clase traballadora galega á reforma laboral aprobada polo Goberno español mediante o Real Decreto-lei 10/2010, do 16 de xuño, de medidas urxentes para a reforma do mercado de traballo, ben como ao seu desenvolvemento e modificacións na tramitación parlamentaria do correspondente proxecto de lei; tanto pola forma en que a reforma se xestou como polos seus contidos claramente regresivos.

a) Crise estrutural do diálogo social:

O proceso de “diálogo social” que se desenvolveu para abordar a reforma tiña un obxectivo marcado previamente: recortar os dereitos laborais. Os documentos públicos do Goberno (o primeiro, do 5 de febreiro) así o confirmaban. Cando o presidente Sr. Rodríguez Zapatero dixo que “faría os axustes custe o que custe” e que “na reforma laboral se tocarían aspectos esenciais” era claro que a grande beneficiada sería a patronal. Desde esa realidade o deseño do “diálogo social” que se realizou supuxo un factor de control social e desmobilización evidente. Nese “diálogo social” preténdese dar a falsa imaxe de que as responsabilidades son compartidas, cando en realidade a xestión das consecuencias da crise se decide de xeito acordado entre os gobernos, a patronal e os poderes financeiros.

b) Proceso sumarísimo contra os dereitos laborais:

O Goberno español decidiu, unha vez máis, impor unha reforma laboral vía Real Decreto-lei, un mecanismo reservado para situacións límite ou urxentes. Ese procedemento utilízase para evitar o debate, a participación e a confrontación social. Tras dar por pechada a mesa de “diálogo social”, o Goberno buscou o acordo coas posicións máis reaccionarias, empeorou sensibelmente o texto inicial e asegurou, aos que permitiron que o Real Decreto-lei se tramite como proxecto de lei, que nese trámite aínda poden recortarse máis dereitos. No Parlamento, e coa colaboración desas forzas políticas, abriuse un “mercado persa” de transaccións que ten por obxecto único lesionar gravemente os dereitos laborais. A decisión de pechar o debate en pleno período do verán (habilitando xullo e agosto para levar a efecto ese atropelo) é unha mostra máis de como se xoga cos dereitos da xente.

c) Lexislación básica estatal:

En Galiza aplícase a lexislación laboral decidida no Estado español, o que supón a aplicación dun modelo de reforma permanente, na que, como se mencionou, os recortes de dereitos conxúganse coa ameaza de recorte das nosas posibilidades de negociación colectiva. Este modelo é moi prexudicial para a clase traballadora.

d) Aspectos regresivos máis salientábeis:

– As medidas aprobadas supoñen facilitar e abaratar o despedimento para todos os traballadores e traballadoras que teñen un contrato indefinido. Ademais, apróbase a subvención pública para parte destes despedimentos.

– A reforma ataca a esencia da negociación colectiva, ao facilitar que as empresas queden exentas da aplicación dos convenios colectivos, en especial no que fai referencia ao salario. Tamén se avanza na posibilidade de que os empresarios, sen acordo coa representación sindical, realicen modificacións substanciais das condicións de traballo.

– A reforma abre novas portas ao negocio empresarial coa intermediación no emprego. Para iso, legalízanse as axencias privadas de colocación con ánimo de lucro, e elimínanse a práctica totalidade das restricións á actuación das empresas de traballo temporal (ETTs), co aumento do risco de sufrir un accidente laboral que iso leva.

– Ao longo do proceso de negociación da reforma laboral, realizado en segredo, saíu a relucir o compromiso da patronal, CCOO e UGT de acordaren unha nova estrutura da negociación colectiva. Non é a primeira vez que se realiza este intento de centralizar a negociación colectiva, para eliminar ou reducir á súa mínima expresión os convenios sectoriais territoriais. A CIG considera que sería moi grave que se negase ou limitase aos traballadores e traballadoras de Galiza o dereito a decidir que e onde negociar. Implicaría, ademais, afastar e dificultar a participación na negociación colectiva da gran maioría dos traballadores e traballadoras, pertencentes á pequena empresa, co retroceso nas súas condicións laborais que iso suporía co tempo.

– Do mesmo xeito que nas reformas anteriores, a temporalidade en fraude, consentida pola nula vontade das administracións laborais en perseguila, volveuse utilizar como escusa para atacar os elementos de protección da relación laboral.

– Son varias as falsidades utilizadas para xustificar a reforma. A primeira é que se creará emprego. Non é verdade; a reforma non suporá nin un emprego novo. Ao contrario, servirá para destruír máis postos de traballo en época de crise. A segunda mentira é que despedir é difícil e caro. En realidade, o despedimento é libre, e non debe ser moi caro vendo a facilidade coa que se destruíron moitos máis empregos que en ningún outro sitio de Europa. Estas e outras falsidades foron estendidas polos denominados “expertos”, un colectivo moi ben identificado ao que lle é imposíbel agochar a súa ligazón estreita co mundo empresarial e financeiro.

– O obxectivo real dos recortes é mellorar a conta de resultados das empresas, dando moito máis poder ao empresario. É inaceptábel que se fale de “mudanza do demodelo produtivo” cando a aposta da reforma se concreta en aumentar a precariedade.

V. En canto ás xestións realizadas para resolver as diferenzas, debemos indicar, con carácter xeral, que a CIG, na súa condición de sindicato máis representativo a nivel da Comunidade Autónoma de Galiza, participa nos órganos de participación institucional da Administración Xeral do Estado, achegando a súa lexítima visión nacionalista e de clase sobre o modelo de relacións laborais e protección social. Igualmente, todos os anos elabora e formula propostas no marco das consultas para a elaboración dos Planos Estatais de Acción para o Emprego que desde 1997 ten a obriga de presentar o Goberno español á Comisión Europea, con escasa receptividade por parte do Goberno.

De forma específica, sobre as causas que motivan a folga, debemos manifestar que o Goberno español excluíu a CIG –ben como os outros sindicatos máis representativos a nivel de comunidade autónoma– de calquera eventual proceso de negociación ou de consultas previo á aprobación do Real Decreto-lei 10/2010, do 16 de xuño. Non obstante, e aínda sendo conscientes da nula vontade de diálogo por parte do Goberno, o pasado día 21 de xullo de 2010 os sindicatos CIG e ELA mantiveron unha xuntanza no Congreso dos Deputados con deputados do BNG, Nafarroa Bai, CiU, PNV e PSOE (non asistiron CC, PP e UpyD), na cal lles fixeron entrega dunha declaración conxunta na cal manifestaban a súa preocupación polo contido antisocial da reforma e solicitaban o rexeitamento dos respectivos grupos parlamentarios ás medidas contidas no Real Decreto-lei 10/2010, do 16 de xuño, con ocasión da tramitación da reforma laboral en sede parlamentaria.

VI. O Comité de Folga estará formado polas seguintes persoas:

• Xesús E. Seixo Fernández

• M. Anxo Garcia Torres

• Manuel Currás Meira

• Margarida Corral Sánchez

• Elvira Patiño Ogea

• Antonio López Rivera

• Ramiro Oubiña Parracho

• Antolín Alcántara Álvarez

• Xosé Francisco Miranda Vigo

• Francisco X. Cartelle Pérez

• Laura Bugallo Sánchez

• Anxo Pérez Carballo

Este Comité de Folga delega expresamente nas estruturas sindicais e nos representantes dos traballadores e traballadoras que en cada caso se designen para os efectos de negociar servizos mínimos e outras cuestións operativas relacionadas co desenvolvemento da folga.

Para os efectos de constancia e comunicación preceptiva, asina a presente en representación da organización sindical convocante, en Santiago de Compostela, a seis de setembro de dous mil e dez.

O secretario xeral da CIG,

Xesús E. Seixo Fernández

Comunicado Convenio Colectivo: 21 meses despois

2010-09-04T01:21:00.000-07:00

Táboas Salariais 2009

A reunión da mesa negociadora viu precedida pola reunión da Comisión Paritaria na que ACCE-CCOO-UGT, aprobaron as táboas salariais do ano pasado (que tiñan que ser aprobadas en xaneiro de 2009, fai 20 meses) pero aínda quedan pendentes do visto bo da patronal.

Non pagaron os atrasos cando correspondían, agora continúan dándolle voltas ás táboas e aínda hai quen está contento e vende coma un logro que haberá táboas con 21 meses de retraso. Como di o refrán “cantos burros alimenta a fariña”.

“Negociación” do novo Convenio

En relación á negociación do Convenio o período de vacacións que se tomaron as empresas tampouco serviu para avanzar; a reunión do día 2 de setembro centrouse nos primeiros artigos do Convenio que falan de: “extensión”, “ámbito temporal” e “compensación, absorción e garantías”.

Sindicatos centralistas e patronal están de acordo en que non se podan negociar convenios de ámbito inferior, é dicir prohiben negociar convenios de empresa ou o convenio de ámbito galego. Non é lóxico impedir que se negocien acordos que melloren o convenio noutros ámbitos, está claro porque a patronal defende esta prohibición, pero CCOO e UGT deberían explicar o motivo.

Máis alá de prohibir negociar noutros marcos, o resto da mañá foi unha disertación sobre a duración do Convenio (con propostas de 2 a 10 anos “se era bo” dixeron algúns). É absurdo falar do que debería durar cando aínda non se avanzou en ningunha das cuestións de calado.

Cremos firmemente que é necesario mobilizar o sector para desbloquear a negociación e conseguir avances reais, o goberno prepara novas reformas, entre elas a da negociación colectiva, continuar alongando a negociación só prexudica aos traballadores/as do sector, como xa nos prexudicou a reforma laboral. Non é o momento de rirlle as grazas á patronal, o 29 de setembro temos folga xeral.

A patronal aplaude aos gobernos central e autonómico e suspende a negociación

2010-07-12T04:42:00.000-07:00

Reunida a mesa negociadora do Convenio Colectitivo Estatal de Contact Center (telemárketing) as empresas anunciaron que:

• Queren aplicar a contrarreforma laboral en todos os apartados e polo tanto piden ampliar no Convenio os prazos máximos previstos para os contratos por Obra ou Servizo.

• Propoñen deixar a negociación ata o mes de setembro. Daquelas nas reunións leríamos artigo por artigo para mirar que propón cada quen.

• Un dos puntos que queren modificar no texto do Convenio é o relativo ás pausas PVD, para eliminar os efectos da recente sentenza do Tribunal Supremo que recoñece unha pausa por hora traballada.

Todos e todas deberemos facer fronte a unha contrarreforma laboral que nos afecta gravemente: abarata e facilita os despedimentos; subvenciona con diñeiro público os despedimentos improcedentes (é dicir inxustos!!); e digan o que digan non pon coto á temporalidade. Por outra banda amplia as posiblidades para que as empresas se descolguen e deixen de aplicar os Convenios e ademais lles facilita un amplo abano de medidas por causas técnicas e organizativas.

Si a estas medidas do goberno central, lle sumamos a complicidade da Consellería de Traballo, temos un difícil panorama no sector. No caso de Sykes a Consellería do PP aprobou como xustificación dun ERE´s (é dicir despedir ao persoal indefinido) o remate dun contrato mercantil e a deslocalización dos servizos cara a outro país.

O 29 de setembro a CIG convocará unha FOLGA XERAL na que estamos chamados a participar. No noso sector, xa de por si precario, as últimas medidas gobernamentais precarizan as nosas condicións e fortalecen á empresas que non agochan a súa satisfacción e prepotencia.

Pero mais ala da FOLGA XERAL en telemárketing é precisa unha resposta inmediata que trataremos de acordar co resto das forzas sindicais.

Seguimento masivo na folga de hoxe

2010-07-07T16:28:00.000-07:00

O seguimento da folga do día 7 de xullo que foi apoiada pola CIG foi masivo, nomeadamente na quenda de tarde. Deste xeito o persoal de Unísono CRM demandou da empresa que se aplique a recente sentenza do Tribunal Supremo que recoñece unha pausa PVD (para protección da saúde laboral) por cada hora de traballo.

A patronal de telemárketing e CCOO acordan agardar pola reforma laboral

2010-06-17T00:37:00.000-07:00

A patronal de telemárketing anunciou que quere suspender a reunión da mesa negociadora do Convenio Colectivo prevista para o día 18 de xuño, á espera de que o Goberno do PSOE aprobe a reforma laboral.

As empresas de telemárketing queren agardar a coñecer os recortes de dereitos laborais (maior flexibilidade interna, abaratamento e facilidade dos despedimentos, modificación dos modelos de contratación, posibilidade de que as empresas deixen de aplicar o convenio alegando mala situación económica, etc), para trasladalos ao noso Convenio. CCOO anunciou que apoia a patronal.

Pola nosa parte solicitamos que se manteña a reunión, non é xusto que as empresas pretendan hipotecar a negociación do Convenio Colectivo, en definitiva as nosas condicións laborais, á aprobación por parte do Goberno dunha reforma laboral lesiva para os nosos intereses.

O vindeiro día 17 de xuño a CIG estará na rúa con manifestacións contra a reforma laboral, unha reforma que como vemos, as avarentas empresas de telemárketing pretenden ser as primeiras en aplicar.

O 17 de xuño, maniféstate coa CIG,
porque esta contrareforma nos afecta directamente

Vigo: Vía Norte ás 20.00 horas.
A Coruña: Praza da Palloza ás 20.00 horas.
Santiago de Compostela: Praza Roxa ás 20.30 horas.
Pontevedra: Praza da Ferrería ás 20.30 horas.
Ferrol: Avenida de Esteiro (local da CIG) ás 20.00 horas.
Lugo: Parque de FRIGSA ás 20.00 horas.
Ourense: Pavillón dos Remedios ás 20.00 horas.
Vilagarcía de Arousa: Casa do Mar (Avda. da Mariña) ás 20.30 horas.

A patronal suspende a negociación á espera da reforma laboral

2010-06-17T00:33:00.000-07:00

A patronal de telemárketing anunciou que quere suspender a reunión da mesa negociadora do Convenio Colectivo prevista para o día 18 de xuño, á espera de que o Goberno do PSOE aprobe a reforma laboral.

As empresas de telemárketing queren agardar a coñecer os recortes de dereitos laborais (maior flexibilidade interna, abaratamento e facilidade dos despedimentos, modificación dos modelos de contratación, posibilidade de que as empresas deixen de aplicar o convenio alegando mala situación económica, etc), para trasladalos ao noso Convenio.

Pola nosa parte solicitamos que se manteña a reunión, non é xusto que as empresas pretendan hipotecar a negociación do Convenio Colectivo, en definitiva as nosas condicións laborais, á aprobación por parte do Goberno dunha reforma laboral lesiva para os nosos intereses. CCOO anunciou que está de acordo coa patronal.

O vindeiro día 17 de xuño a CIG estará na rúa con manifestacións contra a reforma laboral, unha reforma que como vemos, as avarentas empresas de telemárketing pretenden ser as primeiras en aplicar.

O 17 de xuño, maniféstate coa CIG,
porque esta contrareforma nos afecta directamente

Vigo: Vía Norte ás 20.00 horas.

A CIG convoca manifestacións en toda Galiza o 17 de xuño

2010-06-10T05:47:00.001-07:00

Milleiros de persoas perderon o seu posto de traballo dende o inicio da crise grazas as altas taxas de temporalidade, ERE’s e despedimentos individuais e colectivos; agora está en marcha unha reforma laboral para facilitar aínda máis os despedimentos; está anunciada unha reforma das pensións para outubro co fin de alongar a vida laboral; están en marcha recortes nos servizos públicos e aos pensionistas; anunciouse o incremento dos impostos indirectos (mantendo artificialmente baixos os impostos das rendas máis altas); hai un proceso de privatización e precarización dos servizos públicos (hospitais, ensino ou caixas de aforros); continúa a transferencia de renda e recursos públicos ás empresas (multimillonarios rescates bancarios; subvencións públicas ás empresas; pago público de infraestruturas que só interesan ás grandes empresas, etc.).

En definitiva, estamos ante unha crise que os mercados (é dicir, a dereita económica, política e empresarial) queren que paguemos os e as que vivimos do traballo.

Xa pagamos en tempos de bonanza: no laboral, pola implantación dun sistema de organización do traballo en precario (temporalidade, ritmos de traballo asfixiantes, longas xornadas laborais, redución dos salarios) e no económico, porque fomos as vítimas da especulación sobre os bens básicos (alimentos, vivenda, subministro de electricidade, gas e luz, etc.) que xerou a crise.

Dende o inicio da crise vimos reclamando un cambio de modelo económico que habilitase unha saída social. Pola contra, utilizan a crise como escusa para implantar un modelo económico e social que a maioría democrática da cidadanía rexeita.

Por todo isto, a CIG convocamos mobilizacións de protesta e propuxemos a convocatoria dunha FOLGA XERAL en varias ocasións dende o inicio da crise. Entendemos que é preciso pasar a ofensiva, para que non utilicen a crise para implantar un réxime económico e político lesivo para os intereses da maioría.

O vindeiro 17 de xuño os traballadores e traballadoras de toda Galiza estamos chamados a manifestarnos coa CIG.

Vigo, 20:00, Vía Norte
A Coruña, 20:00, Praza da Palloza
Santiago, 20:30, Praza Roxa
Pontevedra, 20:30, Praza de Ferrería
Ferrol, 20:00, Avda. de Esteiro
Lugo, 20:00, Parque de Frigsa
Ourense, 20:00, Pavillón dos Remedios
Vilagarcía de Arousa, 20:30, Casa do Mar

Convenio: Houston temos un problema!!!

2010-05-31T05:06:00.000-07:00

Na última reunión da mesa negociadora do Convenio Colectivo quedou claro que a patronal non vai mover peza á espera de dous acontecementos:

Por unha parte, tal como anunciaron, as empresas queren agardar a reforma laboral que neste momento negocian de xeito opaco e sen que coñezamos do que están falando CCOO-UGT e a CEOE en Madrid, ou incluso a que o Goberno central poña en marcha; unha reforma unilateral como piden Organismos totalmente desprestixiados como o FMI (Fondo Monetario Internacional). Outras reformas abarataron os despedimentos e ampliaron a temporalidade entre outras cuestións; a patronal sabe que nese terreo leva as de gañar.

Por outra banda, varias patronais, en outros convenios abertos, xa anunciaron que queren baixar os salarios ao amparo do decretazo do Goberno para os empregados e empregadas públicos. Se o Goberno rebaixa os salarios ao persoal público eles tamén queren rebaixalos para o persoal das empresas privadas.

A reforma laboral en marcha e o recorte das pensións e do salario dos empregados/as públicos afectan á negociación do noso Convenio.

Dende a CIG pensamos que ante a situación creada por ambas cuestións e ante o incremento do paro e contra quen quere facer pagar a crise aos que non somos responsables da mesma, todos os sindicatos deberíamos poñernos de acordo para convocar unha Folga Xeral que afecte en todos os sectores en todo o Estado.

Dificilmente os traballadores e traballadoras de Telemárketing poderemos conseguir un bo convenio que inclúa unha suba salarial digna, se non hai unha resposta colectiva fronte aos recortes, axustes e a reforma laboral.

Gañamos as eleccións: grazas!!

2010-05-18T12:55:00.000-07:00

Grazas a todas as persoas que nos apoiachedes ao longo do proceso electoral, noemadamente às que votáchedes a nosa candidatura.

A CIG tivo 222 votos e subiu a 9 delegadas; CGT 156 votos e 6 delegados; CCOO 110 votos e 5 delegados e por último UGT 77 votos e 3 delegadas.

Ata o de agora no Comité había só 3 delegadas da CIG.

Ao longo da campaña electoral non fixemos promesas, explicamos o noso traballo. O noso compromiso e seguir traballando día a día para tratar de mellorar as condicións de traballo de todo o persoal de Unísono CRM en Vigo.

De novo grazas a todos e todas.

O 18 de maio eleccións sindicais en Unísono Vigo, presentada candidatura.

2010-05-11T01:26:00.000-07:00

A CIG xa presentoua súa candidatura, composta por 57 compañeiros e compañeiras de todas as campañas, departamentos, das diferentes quendas e centros de traballo.

Dende aquí queremos agradecer unha vez mais o apoio prestado que fixo da candidatura da CIG a maior de todas as presentadas.

Convenio telemárketing: reducir custes a costa da saúde

2010-05-10T00:07:00.001-07:00

Na reunión do 7 de maio abordamos todo o relativo a Saúde Laboral; pasamos a relatarvos as distintas posicións sobre as cuestións faladas.

Non podemos considerar a saúde laboral unha cuestión menor, nomeadamente polos riscos psicosociais do noso traballo que desembocan nun gran número de baixas por enfermidades (estrés, depresión, ansiedade, etc.). No telemárketing non caemos do andamio, pero estamos expostas/os a unha gran carga mental, tanto pola atención á clientela como polos ritmos de traballo e as precarias condicións laborais.

Patronal

Queren especificar o número de pausas PVD para cada tipo de xornada; propoñen rebaixar as pausas PVD a razón de 6 por cada 8 horas de traballo. Din que non comparten a sentenza que perderon na Audiencia Nacional, que establece que o tempo de descanso é tempo de traballo efectivo, polo que por cada hora de traballo corresponde unha pausa.

CIG

1. A lexislación recomenda que as pausas PVD sexan de 10 minutos, mentres que o actual convenio establece pausas de 5 minutos.

Dende a CIG defendemos a ampliación das pausas a 7 minutos. Loxicamente defendemos manter unha pausa PVD por hora traballada. As pausas teñen como fin a protección da nosa saúde, polo que non cabe a posición da patronal pretendendo recortar custes a costa da nosa saúde.

2. Establecer que o tempo entre chamadas non poda ser inferior a 50 segundos, tanto para emisión como para recepción.

3. Que a representación dos traballadores e traballadoras poda rexeitar a Mutua elixida pola empresa, xa que temos detectado numerosos abusos por parte dalgunhas mutuas.

4. Implantar a obriga por parte das empresas de subscribir unha póliza de seguros de accidentes (tanto laboral como común), durante as 24 horas do día, que cubra os riscos de morte, invalidez permanente absoluta ou total, así como a gran invalidez, por unha contía de 20.000 euros.

A reunión non deu máis de si, xa que a patronal non deu contestación ás reivindicacións sindicais.

A vindeira será o 21 de maio na que toca Igualdade, Protección da maternidade e Formación.

Axudas Xunta de Galicia á conciliación da vida laboral e familiar

2010-05-04T03:44:00.001-07:00

O Diario Oficial de Galicia fai publica a resolución do 23 de abril de 2010, da Secretaría Xeral da Igualdade, pola que se regulan as bases para a concesión das axudas á conciliación da vida familiar e laboral como medida de fomento da corresponsabilidade para os traballadores que se acollan á redución da súa xornada de traballo. As solicitudes poderán presentarse ata o 31 de agosto de 2010.

Podes ver aquí un resumo.

A patronal ponse caprichosa

2010-04-14T05:32:00.001-07:00

Hoxe tivo lugar unha nova reunión da Mesa Negociadora do Convenio Colectivo. Pasamos a relatarvos as distintas cuestións faladas, as nosas reivindicacións e a contestación da patronal a cada unha delas.

Malia as sentenzas ao noso favor a patronal non quere pagar

Dado que as sentenzas do Tribunal Supremo noutros sectores recoñecen que o IPC previsto no ano 2009 era o 2%, pedimos ás empresas de telemárketing que paguen dunha vez, pero a patronal di que agardarán ata que o TS conteste ao seu recurso.

Temporalidade: Máis temporalidade e poder despedir aos indefinidos.

CIG: defendemos que o contrato tipo debe ser indefinido, deixando os temporais para a casuística concreta como no resto de sectores (cobertura de baixas, novas campañas de reducida duración, etc).

Os traballadores e traballadoras non podemos caer na trampa de defender unha porcentaxe de indefinidos. Todos os postos de traballo deben ser fixos, deixando a temporalidade como algo excepcional para os casos previstos na lei.

Apostamos por prohibir as ETT no sector, incorporando ao actual persoal ás empresas.

E queremos que se elimine o artigo 17 para que calquera despedimento colectivo conte coas garantías mínimas recollidas na lei con carácter xeral. O telemárketing non pode ser unha excepción na que se lles faciliten os despedimentos masivos. Así mesmo, consideramos imprescindible a subrogación en todos os casos.

Patronal: Defenden ampliar a 1 ano os contratos eventuais, e poder aplicar ao persoal indefinido o artigo 17, é dicir, poder despedir de xeito colectivo saltándose as garantías legais que implican os ERE (expedientes de regulación de emprego).

Carreira Profesional: A actual favorece ás empresas e non queren cambiala.

CIG: defendemos que incluamos un novo catálogo de postos que redefina as funcións e que se recollan dúas novas categorías:

Teleoperador/a de primeira: aos 2 anos de prestar servizo como teleoperador/a especialista, cun incremento salarial do 4%.

Xestor/a de primeira: aos 2 anos de prestar servizo como xestor/a, cun incremento salarial do 4%.

Ademais, pedimos que desapareza a Comisión de Carreira Profesional constituída pola patronal, CCOO e UGT, por non ser operativa.

Patronal: contestou que ata que non saiba a suba salarial definitiva do Convenio, non vai a entrar en negociación sobre cuestións que impliquen incremento de custes. Así mesmo queren manter a actual Comisión (claro a eles vaille ben).

Celebróuse o V Congreso da nosa Federación

2010-04-13T03:12:00.001-07:00

O V Congreso da Federación da Banca da CIG estivo marcado pola crise e restruturación do sistema financeiro, nomeadamente das Caixas de Aforros e pola grave deslocalización do sector do telemarketing. Aprobouse unha resolución que avala a presentación dun posible recurso contra a aplicación do Regulamento do FROB para impedir a liquidación parcial das Caixas e a venda de rede á banca privada.

O sábado 10 de marzo celebrouse na cidade de Ourense o V Congreso da Federación de Banca, Aforro, Seguros e Oficinas da CIG baixo o lema "O Valor do sindicato" co que se quixo contrapoñer os valores que representa o sindicalismo nacionalista e de clase fronte a quenes cuestionan a vixencia do sindicalismo.

Minuto de silencio

Ao inicio do acto gardouse un minuto de silencio en memoria do compañeiro Fernando Pol traballador da CIG que sempre colaborou estreitamente coa Federación e de Marcelino Gomez, historico da CIG en Caixavigo, delegado no Comité Provincial de Caixanova en Ourense que era compromisario para o propio Congreso.

A continuación, deu comezo o Congreso propiamente dito, e despois de cantar a Internacional, o secretario comarcal da CIG-Ourense, Etelvino Blanco, dirixiu unhas palabras de benvida ás e aos asistentes a este V Congreso.

Informe da Executiva e do Secretariado

Unha vez aprobado o Regulamento do Congreso por unanimidade, o secretario nacional saínte da Federación, Clodo Montero, deu lectura ao Informe da Executiva e Secretariado Nacional. No informe destacouse que a Federación segue a ter o seu núcleo central no sector financeiro, pero que hoxe organiza ao persoal de todo o sector administrativo privado, nomeadamente grazas ao medre dun 38% da afiliación nos últimos catro anos froito dunha maior atención aos distintos sectores. Este informe foi aprobado con 111 votos a favor e 3 abstencións.

A seguir, o Congreso aprobou tamén por unanimidade a proposta de Mesa Presidencial que quedou composta por Xosé Ramón González, Chelo Lago, Xosé Valcárcel, María Louro e Luis Sabuz.

Posteriormente Teresa Richard e Sefi Romero fixeron a presentación do Relatorio de Organización e as modificacións Estatutarias, que tamén foron aprobadas.

Delegacións convidadas

A sesión matinal pechouse coa intervención das delegacións convidadas, ELA (Óskar Rodríguez e Marce Murias) e LAB (Joxean Urkiola) de Euskalherria, a Comissao de Trabalhadores do BBVA de Portugal (Luis Filipe Pinto e Paulo Alves) e da AEBU (Leonardo Batalla), o sindicato de rama Uruguaio integrado na PIT-CNT. Neste senso a CIG foi convidada a participar nun cúmio sindical da Banca latinoamericana que terá lugar no mes de maio en Brasil.

Relatorio de acción sindical

Xa pola tarde Gladis Afonso e Clodo Montero foron os encargados de presentar o Relatorio de Acción Sindical, que incidiu na gravidade da crise do sector financeiro no Estado que levou a un rescate multimillonario por parte do goberno que estaría na orixe do déficit público; na defensa da lei de Caixas do Parlamento Galego, un instrumento de democratización das Caixas pero tamén de soberanía financeira e recuperación económica; no modelo de organización do traballo toiotista que se está implantando no sector financeiro; do produtivismo capitalista laboral; da grave situación que atravesa o sector de telemarketing; e da necesidade de avanzar na soberania laboral, no marco galego.

Posteriormente procedeuse a elección do Secretario Nacional, da Executiva Federal e dos/as representantes no Consello Confederal, presentandose candidaturas únicas de integración.

Clodo Montero foi reelixido Secretario con 104 votos a favor e 1 voto en branco.

A candidatura para o Consello Confederal integrada por Clodo Montero, Sefi Romero, Gladis Afonso e Paco Diéguez foi elixida con 105 votos a favor.

Nova executiva

A Executiva que foi elixida con 104 votos a favor e 1 en branco está integrada por persoas cunha longa traxectoria sindical e por cadros sindicais dos sectores emerxentes; por persoas da banca, caixas, telemárketing ou seguros, provintes de todas as zonas do país.

Esta Executiva queda integrada polas seguintes persoas: Clodo Montero de Caixa Galicia, Sefi Romero da CIG, Gladis Afonso e Pilar Cebreiro do Banco Pastor, Laura Pérez Figueroa de Bosch Telemárketing, Iria Salvande da CIG, Xabier Blanco de Axa Seguros, Manolo González de Caixanova e Miguel Fernández do BBVA.

Resolucións aprobadas

O V Congreso aprobou tres resolucións: Unha esixindo a retirada do decretazo do galego e en apoio a Iniciativa Lexislativa Popular; outra de apoio a loita que manteñen os cadros de persoal de Sykes contra a deslocalización e por último unha na que avala que a CIG estude presentar un contencioso administrativo contra o Regulamento do FROB que permite ao BdE liquidar parcialmente e vender a banca privada parte da rede actual das Caixas, na mesma resolución o V Congreso posicionouse contra a entrada de capital privado nas Caixas.

Acto de clausura

No acto de clausura do V Congreso da Federación de Banca, Aforro, Seguros, Oficinas e Telemárketing (nome completo da Federación segundo o aprobado nas modificacións estatutarias), interviron o reelixido Clodo Montero, e o secretario xeral da CIG, Suso Seixo. Ao remate destas intervencións cantouse o himno galego.

Concentracións en Unísono contra os despedimentos

2010-03-23T14:39:00.000-07:00

A CIG xa alertou a principios deste mes da posiblidade de que a deslocalización emprendida por Vodafone poidera afectar a campaña de recepción de chamadas na empresa Unísono CRM en Vigo. Finalmente serán 16 as persoas despedidas.

Unísono Chile é unha das empresas beneficiadas pola deslocalización de Vodafone cara a América Latina que está afectando gravemente ao emprego no sector de telemárketing en Galiza.

"Fin de campaña"

A empresa que anunciou o "fin da campaña" Vodafone recepción, comunicou a representación da CIG que despedirá a 16 persoas a final de mes incumprindo o compromiso previo de recolocación. A empresa alega que non pode contratar ao persoal afectado por que levaría mais de 24 meses na empresa con dous contratos e debería facelos fixos conforme a lexislación. Pero a súa vez a empresa négase a realizar a transformación de contratos temporais en indefinidos obrigatoria por convenio.

Convocada polo Comité

A CIG trasladou ao Comité de Empresa a información da empresa, aprobandose por unanimidade emprender mobilizacións de xeito inmediato para exixir a recolocación do persoal afectado, sendo as concentracións do martes 23 de marzo a primeira destas mobilizacións.

A patronal non ten intención de negociar o Convenio

2010-03-18T04:56:00.000-07:00

A patronal de Contac Center, como gustan en chamarse xa que a sociedade considera pexorativo o termo telemárketing, non ten intención de negociar un novo convenio colectivo en tanto non teñamos sentenza definitiva sobre a suba salarial que nos adebedan correspondente aos anos 2009 e 2010. E aínda que houbera sentenza definitiva dubidamos da súa intención de negociar, están demasiado cómodos co marco actual.

Na reunión prevista para falar de tempo de traballo, cada un dos sindicatos presentamos as propostas recollidas nas distintas plataformas. A patronal contestou na súa liña: quere recortar dereitos en materia de IT e que prefería que en cada unha das reunións presentásemos as nosas propostas para entrar con posterioridade na negociación real.

Cando a ACCE decidiu non pagar a suba salarial defendemos a necesidade de avanzar na unidade de acción sindical e promover mobilizacións xerais no sector para non dar unha imaxe de debilidade sindical ante o abuso patronal.

Noutros sectores onde o persoal gaña máis que no noso e teñen mellores condicións económicas, todos os sindicatos se uniron e mobilizaron, conseguindo acordos de abono da suba prevista á espera da sentenza.

O vindeiro día 14 de abril está prevista unha nova reunión, onde cada quen defenderá a súa Plataforma no referido a Clasificación Profesional. A patronal calará e fixaremos unha nova data para falar dun novo punto.

A negociación do Convenio Colectivo nace bloqueada pola actitude prepotente da patronal, antes que cedo verémonos obrigados a tomar medidas conxuntas e comezar por defender a suba salarial dos anos 2009 e 2010.

A patronal di que quere recortar custes

2010-03-05T05:06:00.001-08:00

Na reunión do 5 de marzo a patronal dixo dende o inicio que non ia falar de salarios en tanto non estivera pechada a suba salarial. Pero incidiron na necesidade de reducir custes debido a crise para contribuír ao mantemento dos postos de traballo.

Pola nosa parte contestamos que o Convenio 2007-2009 mantivo intactas as precarias condicións de traballo: baixos salarios; inconcreción nas categorías que levan a manter baixos os salarios: altas taxas de temporalidade; facilidades para os despedimentos; horarios ilimitados 24 horas 365 días ao ano; etc. E que non evitou despedimentos no estado e a creación de emprego fora.

Evolución do emprego durante a aplicación do convenio anterior.

Polo tanto entendemos que a ameaza de deslocalización non se evita con recortes laborais e defendemos as medidas que reivindicamos na nosa plataforma:

Pluses

-Creación dun plus salarial de antigüidade de 50 Euros ao mes aos 5 anos de antigüidade na empresa baixo calquera modalidade de contratación.

-Que cando se traballe un sábado se perciba un recargo equivalente ao plus de domingos.

-Que o persoal con quenda partida perciba unha dieta de 7 euros ao día.

-Cobro do Plus de Idiomas cando se use un idioma cooficial da propia comunidade autónoma, actualmente pagan a quen fala galego fora de Galiza, polo que pedimos que de manter esa discriminación nos paguen o plus de idioma a nos por falar catelan en Galiza.

Festivos

-Librar o 1 e 6 de xaneiro e o 24 e 31 decembro agás nos servizos de urxencias e emerxencias.

-Cando o día de libranza coincida cun festivo, haberá que compensar ao traballador/a con outro día de libranza.

O día 16 de marzo haberá nova reunión na que falaremos de “tempo de traballo”.

Plataforma negociación Convenio

2010-03-03T04:36:00.000-08:00

Podes ver a Plataforma da CIG para a negociación do Convenio aquí.

2 reunión mesa negociadora Convenio Colectivo

2010-02-17T11:38:00.000-08:00

Como punto previo á reunión pedimos un posicionamento da mesa negociadora en contra do actual proceso de deslocalización de Vodafone que afecta a varias plataformas a nivel galego. Recibimos o apoio da CGT, CCOO e UGT, din que se opoñen a deslocalización pero é un problema legal que non corresponde a mesa negociadora. ACCE non se quere manifestar contra “os seus clientes”... pois vale.

Os sindicatos demandamos como punto previo que se cumpra a suba salarial do anterior convenio, negándose a patronal por estar ademais xudicializada a cuestión. A CIG quere que se abone o 2,25% pactado, incluíndo unha cláusula que non nos obrigue a devolver diñeiro se a sentenza do Tribunal Supremo fose favorable ás empresas. Tamén temos que denunciar a outros sindicatos que “protestaron” polo impago e agora piden subas do 1% para este ano e nas súas plataformas, volven ligar o salario ao IPC.

Posteriormente decidiuse continuar coa negociación, a espera da resolución xudicial e entregáronse as distintas plataformas. Como introdución, solicitamos que se podan negociar convenios a nivel galego e de empresa, que podan mellorar as condicións laborais de xeito pactado, para pasar as nosas reivindicacións básicas:

SALARIOS

Dixemos que a CIG non está atada polo acordo interconfederal (asinado por CCOO, UGT e CEOE) que recolle unha suba para o ano 2010 entre o 0 e o 1%. Reclamamos unha suba lineal de 540 euros.
Defendemos tamén a creación dun complemento por antigüidade de 50 euros por paga, a cobrar a partir dos 5 anos na empresa.

EMPREGO

Despois de 11 anos, o sector non se pode considerar en vías de consolidación, a temporalidade é inaceptable, o emprego estable é o emprego fixo. A temporalidade debe acotarse á causalidade só para casos moi concretos. Así mesmo os despedimentos colectivos deben ampararse na lexislación básica, desaparecendo as excepcións que contempla o Convenio.

XORNADA

É preciso reducir o tempo de traballo para crear emprego, reivindicamos a xornada de 35 horas sen rebaixa salarial. Así mesmo reivindicamos medidas para ampliar o tempo de descanso.

CARREIRA PROFESIONAL

A comisión creada non serviu para nada. É preciso redefinir o catálogo de postos neste convenio sen máis dilación.
Apostamos pola creación de 2 novas categorías: teleoperador de 1ª e xestor/a de 1ª cun incremento salarial do 4% sobre as táboas actuais.

Quedaron fixadas 2 novas reunións para o 5 e o 16 de marzo. Na do día 5 trataremos incentivos, pluses e tempo de traballo.

Por parte da CIG farémosvos chegar a nosa Plataforma nos vindeiros días co fin de que coñezades as reivindicacións que trasladamos á mesa.

As mobilizacións de Bosch e Sykes

2010-02-10T01:52:00.001-08:00

Bosch

Faro de Vigo

Sykes

La Voz de Galicia

La Opinión A Coruña

Correo Gallego

Solidariedade coas compañeiras de Sykes A Coruña e Bosch Vigo

2010-02-09T10:04:00.000-08:00

Hoxe as compañeiras e compañeiros de Sykes comezaron as mobilizacións e paros contra os despedimentos masivos nas campañas do 1004 e Vodafone. As mobilizacións continuaran o día 15 de febreiro, no que tamén as compañeiras e compañeiros de Bosch f teñen convocado unha folga.

Estes despedimentos non son froito da crise, son froito da deslocalización pura e dura coa colaboracion do Ministerio de Xustiza do PSOE.

Constituída a mesa negociadora II Convenio Contact Center

2010-01-22T05:05:00.000-08:00

Por fin hoxe día 22 de xaneiro, constituíuse a Mesa negociadora do II Convenio Colectivo de Contact Center, na que a CIG estará presente para trasladar a voz e defender directamente e sen intermediarios os intereses dos traballadores e traballadoras de Galiza.

O Convenio é a norma básica que regula as nosas condicións laborais: en materia de salarios, contratacións, horarios, despedimentos, etc., polo que entendemos que a vosa participación será decisiva ante a difícil negociación que teremos que afrontar.

Inicialmente a CIG e os sindicatos vascos ELA e LAB solicitamos a constitución de mesas negociadoras de ámbito galego, no noso caso, e vasco no deles, posibilidade que contempla a vixente lexislación e que nós defendemos. A proposta foi rexeitada pola Patronal.

Unha vez constituída formalmente a Mesa a nivel estatal, que estará integrada por CIG, LAB, ELA, CGT, CCOO e UGT, marcouse para o vindeiro día 12 de febreiro a primeira reunión de traballo.

Dende a CIG defendemos que o actual convenio precisa unha fonda, moi fonda revisión, que garanta o mantemento dos postos de traballo e unhas condicións dignas. O ámbito estatal caracterízase polos baixos salarios, a contratación precaria, a facilidade dos despedimentos ou xornadas laborais continuadas de ata 10 días. Nós defendemos outro marco: o galego.

En todo caso a Patronal aposta por manter centralizada a negociación para manter as precarias condicións laborais. Nós apostamos por outra vía, pero continuaremos representando os vosos intereses na Mesa negociadora estatal para tratar de avanzar, sabendo que non é o mellor marco para conseguilo.

A todo o persoal de Unísono

2009-12-16T04:22:00.000-08:00

Nestes últimos días, grazas ós comunicados repartidos primeiro por CCOO e logo por CGT, coñecemos dúas convocatorias de mobilización distintas, que se van levar a cabo na nosa empresa.

Na Sección Sindical da CIG, estamos completamente de acordo cos motivos que se expoñen para convocar estas mobilizacións, pero cremos que non é a maneira máis axeitada de reivindicalos.

Parécenos que o despedimento da compañeira da campaña de Iberdrola non está xustificado dende ningún punto de vista, xa que esta se limitou a seguir o procedemento establecido pola empresa. Lonxe de ser esta rapaza a culpable dun “erro fatal” como a empresa quixo facer ver, pensamos que foi vítima dun acto de covardía total por parte das persoas responsables da campaña e/ou empresa, incapaces de asumir as súas responsabilidades.

Os motivos da outra mobilización proposta, non son menos importantes dende logo; a suba salarial, a conversión de contratos en indefinidos, o ritmo de traballo..., estas cuestións preocupan seriamente á CIG ao igual que a Sección Sindical convocante.

Agora ben, pensamos que se xuntamos as nosas forzas, conseguiremos máis repercusión, e se temos que facer unha folga, a faremos, pero con un plantexamento firme e claro.

Ningunha das outras seccións sindicais se puxo en contacto con nós para pedir a nosa colaboración, nin tampouco sabemos se se puxeron en contacto entre elas (semella que non). Ao mesmo tempo, descoñecemos a legalidade ou non destas convocatorias, posto que non temos ningunha documentación que as avale.

Así pois, a CIG, como organización, non vai secundar estas mobilizacións, aínda que, a nivel persoal, cada un dos traballadores e traballadoras de Unisono, deberedes valorar a vosa participación nelas.

Seguimos estando en disposición de sentarnos co resto do Comité de empresa, para traballar conxuntamente na procura de iniciativas que, finalmente, consigan que o persoal de Unisono en Vigo acade unhas condicións de traballo máis dignas e xustas.

Solidariedade cos compañeiros e compañeiras de Chile

2009-10-09T05:09:00.001-07:00

Dende a Sección Sindical da CIG en Unísono-Vigo, queremos amosar a nosa solidariedade internacionalista e de clase coa loita dos teleoperadores/as de Unísono en Chile por un convenio xusto.

SINTRAC

Campaña Iberdrola

2009-10-09T05:08:00.001-07:00

Dende a Sección Sindical da CIG en Unísono vimos detectando que na campaña de Iberdrola, fanse dous tipos de contratación distintos: “Por obra ou servizo determinado” e “Contratación eventual por circunstancias da produción”.

Esta é unha maneira de que a empresa poda despedir á xente con máis facilidade e de forma máis barata coa que non estamos de acordo, xa que están botando á rúa a traballadoras/es que entraron ao mesmo tempo que o persoal que ten contratos por obra, e está cubrindo os mesmos postos con novos contratos eventuais.

Falaremos coa empresa na procura de vías para evitar este tipo de actuacións, utilizando para elo os recursos que teñamos ao noso alcance.

Ademais do anterior, queremos que saibades que as delegadas da CIG en Unísono estamos á vosa disposición para acompañarvos a RRHH a buscar os vosos finiquitos, para asesorarvos no que necesitedes. Tedes dereito á presenza dun/dunha representante sindical para esas situacións.

Se non queredes facer uso deste dereito, recomendámosvos que asinedes Recibido e Non conforme nos documentos que vos entregue a empresa, xa que temos coñecemento a través de varios dos traballadores e traballadoras con contrato eventual xa finalizado, que no finiquito do seu despedimento cometéronse varias irregularidades como a falta de pago das vacacións correspondentes ou a indemnización por fin de contrato.

Vigo, 2 de outubro de 2009

Incumprimento do Convenio no cambio de campaña de Vodafone HD Residencial

2009-10-09T05:06:00.000-07:00

O mércores da semana pasada a CIG mantivo unha reunión co Xefe de Inspección de Traballo en Pontevedra, en relación a nosa denuncia polo incumprimento do artigo 18 do Convenio por parte de Unísono e Bosch no cambio de empresa da campaña de Vodafone HD Residencial.

O xoves comezaron as accións inspectoras e o venres Unísono facilitou os primeiros datos. A data do venres, das 164 persoas que traballaban na campaña HD Residencial en Bosch, 30 foron recolocadas por esa empresa e só 41 estaban contratadas por Unísono das 90 que se presentaron ao proceso de selección. Outro grupo estaba pendente de contratación por Unísono, ofertando só xornada de fin de semana.

Ampliamos a denuncia anterior, xa que Unísono tiña a obriga de contratar ao 90% do persoal, pero ademais as persoas contratadas viron vulnerados os seus dereitos: á maioría delas reducíronlle horas de contrato; non lle respectaron a categoría de teleoperador/a especialista e o contrato ten un período de proba de un mes durante o cal poderán ser despedidas, en contra do establecido no convenio.

Unísono alegou que non tiña horas suficientes para ofertar a mesma xornada que tiñan en Bosch, pero é falso: o 14 de setembro detectamos en “Infojobs” unha oferta de 60 postos con 30 horas de xornada para esta campaña, feito que tamén comunicamos á Inspección.

Algunhas persoas terían rexeitado a oferta de Unísono, xa que a reducción das horas de contratos e da categoría podería afectar incluso ao paro que percibirian se Unísono as despedise no período de proba (algo habitual).

Esixir o mantemento dos postos de traballo para estes compañeiros/as e o respecto as súas condicións laborais, é defender os postos de traballo de todos e cada un de nós. Se hoxe permitimos que as empresas incumpran o Convenio, sentariamos un mal precedente.

Agardamos que Unísono Soluciones cumpra o Convenio, a CIG en Bosch xa ten anunciado a convocatoria de folga; se Unísono non garante os postos de traballo e as condicións laborais, tamén terá un conflito laboral.

Vigo, 21 de setembro de 2009

balance sindical dixital

2009-07-15T05:46:00.001-07:00

Novo espazo na rede da nosa Federación con novas de todo o sector financeiro, telemárketing, etc. É a edición dixital do noso voceiro en papel, o balance sindical.

Proposta conversión en indefnidos

2009-07-01T05:08:00.000-07:00

Onte presentamoslle a RRHH-Vigo unha proposta de transformación de contratos en indefinidos co fin de tratar de chegar a un acordo incrementando o número de persoas con contrato estable na nosa Plataforma.

Agardamos contestación por parte da Empresa, da que vos daremos cumprida información.

Balance Sindical nº 20

2009-06-12T10:04:00.000-07:00

Xa está na rúa o voceiro da Federación, un novo número da edición en papel do "Balance Sindical", podes consultaro en internet a través do seguinte enlace.

Balance Sindical n 20

Publish at Calaméo or browse others.

Sobre o "conflito" de ccoo

2009-06-11T05:18:00.000-07:00

O pasado 9 de xuño, CCOO informou nunha circular da presentación dun suposto conflito colectivo reclamando a categoría de xestor, sen especificar para que campañas.

A posibilidade de presentar un conflito colectivo foi avaliada pola CIG, pero optamos pola presentación das demandas individuais e así conseguimos a categoría de xestor/a para o persoal do SIF. As demandas individuais son inmediatas e non teñen recurso.

En primeiro lugar, o conflito colectivo ante a Audiencia Provincial podería ter recurso ante o Tribunal Superior de Xustiza de Galicia, posteriormente ante a Audiencia Nacional, posteriormente ante o Tribunal Supremo e podería chegar no peor dos extremos incluso ao Tribunal Constitucional. Quere dicir que a sentenza deste conflito colectivo pode tardar ata 5-6 anos en ser firme. Todos e todas sabedes que a vida laboral en Unísono é moito máis corta do que pode tardar unha sentenza firme.

En segundo, e o máis grave, é que hai demandas individuais en marcha, demandas que poden quedar paralizadas pola presentación do conflito colectivo. Co seu conflito unilateral prexudican a compañeiros e compañeiras que presentaron a súa reclamación.

Por último hai tamén un problema de forma: a Lei esixe que un conflito colectivo se presente contra a empresa, pero citando como parte a todos os sindicatos con presenza na mesma. Se hai un conflito colectivo, habería un claro defecto de forma, xa que non fomos citados o resto dos sindicatos, o que pode facer que o conflito non prospere.

Co ánimo de apuntarse non sei qué tanto, CCOO acaba de adiar a solución máis alá do razoable, acabou favorecendo á empresa, ou simplemente é o que pretendían.

Unísono deberá abonar o 2,25% deste ano

2009-06-11T01:17:00.000-07:00

A Audiencia Nacional fallou a favor do persoal no conflito colectivo interposto por toda a representación sindical contra a decisión da patronal de telemárketing de non abonar a suba salarial establecida en Convenio para este ano.

Compensacións gastos desprazamentos pola Mutua

2009-06-08T05:08:00.000-07:00

A Orde TIN/971/2009 do Ministerio de Traballo e Inmigración, de 16 de abril, establece o dereito á compensación dos gastos de transporte en casos de asistencia sanitaria derivada de riscos profesionais e das comparecencias para a realización de exames ou valoracións médicas nas Mutuas (nos procesos derivados tanto de continxencias comúns como profesionais).

Era habitual que as Mutuas chamaran ao persoal en situación de baixa médica para facer avaliacións propias, estando regulado por Lei a obrigatoriedade para o traballador ou traballadora da asistencia a estes recoñecementos. Pero tamén era habitual que estas entidades se negasen a compensar os gastos de desprazamentos cando o persoal utilizaba medios de transporte ordinarios (coche propio, taxis, etc).

Agora a Orde Ministerial reafirma o dereito das persoas a ser resarcidas nos gastos producidos por estas comparecencias, sen dúbida un recoñecemento xusto, malia que o problema real é a existencia das propias Mutuas.

Cabe lembrar que a CIG ten realizado numerosas mobilizacións ante as Mutuas contra a persecución que exercen sobre os traballadores e traballadoras de baixa.

Neste senso un recente informe remitido polo Tribunal de Contas ao Congreso dos Deputados denunciaba os excesivos salarios do persoal directivo das Mutuas (con cargo aos fondos públicos), así como pagos indebidos e numerosas irregularidades. Segundo o informe, nas 8 Mutuas analizadas hai 237 directivos cuns salarios que superaban ao dos altos cargos do goberno.

O informe destapou que as Mutuas empregan fondos públicos para pagos a asociacións empresariais co fin de captar empresas asociadas. Tamén algunhas das ofertas realizadas para captar ás empresas terían un custe non asumible pola Seguridade Social.

Pero o informe do Tribunal de Contas vai máis alá, xa que detectou irregularidades laborais, incluso cesión ilegal de persoal por parte das Mutuas, práctica prohibida pola lexislación laboral agás a excepción das Empresas de Traballo Temporal.

Manifestación solidariedade co Metal

2009-06-08T04:52:00.000-07:00

O martes 9 de xuño ás oito da tarde terá lugar unha manifestación na cidade de Vigo, convocada por CIG, CCOO e UGT, en solidariedade coa loita do Metal e en apoio aos milleiros de traballadores que despois de seis xornadas de folga continuarán nesta semana cunha nova convocatoria de folga, que desde o mércores será indefinida e que o venres esta folga terá carácter xeral polo que están chamadas todas as empresas do sector, mesmo aquelas que teñen convenio propio. A continuación reproducimos un folleto que vai ser repartido á cidadanía, chamando á convocatoria desta manifestación, que sairá ás oito da tarde do cruce de Gran Vía con Urzáiz e que rematará na Praza da Estrela.

Os traballadores e traballadoras do Metal a toda a cidadanía

Queremos transmitirvos a nosa verdade por medio deste escrito xa que os acontecementos diarios son constantemente deformados interesadamente por algúns medios de comunicación, que tamén son empresas.

Antes de nada pedir desculpas polos trastornos que causamos nas nosas manifestacións, e sobre todo cando son disoltas de xeito brutal pola policía recaendo tamén nos cidadáns os golpes e pelotazos. Incluso os danos materiais nos negocios que por darnos acollida aos manifestantes, as súas cristaleiras son abatidas a queimarroupa en diferentes lugares da cidade.

Os 23.000 traballadores do Sector do Metal na Provincia, soldadores, mecánicos, chapistas, caldereiros, electricistas, torneiros, fresadores, pintores, fontaneiros, etc, somos os pais dos mozos e mozas que andan polas rúas da cidade, somos os irmáns, primos, fillos e fillas, os amigos e amigas que coñecedes, os amigos dos vosos fillos e das vosas fillas, somos como a inmensa maioría, traballadores que cobramos sobre mil euros en oito horas, e como non chega para pagar os gastos da casa e todo o demais, moitos de nós traballa once horas ao día, e por esta razón, cando chegamos aos cincuenta anos temos diferentes lesións incurábeis.

Todos os anos vemos falecer algún compañeiro en accidente laboral, mentres os nosos Patróns non renuncian aos seus chalets con piscinas nin aos seus barcos nin as grandes comidas nos mellores restaurantes. Eles nunca acaban pobres. Moitos empresarios non cumpren a Lei que é o noso Convenio, e traen traballadores de fora pagándolles a metade do salario, porque nós debemos resultarlles caro. Esta é a verdade do Metal.

Pedimos 0,50€ de incremento por hora traballada, pero eles xa subiron mais de 3 € na mesma hora aos seus clientes. Falan de crise e aproveitan para despedir de maneira barata, mentres reciben millóns de axuda pública do diñeiro que nos pagamos como impostos. Din que xa perderon 70 Millóns de € con esta Folga, pois con este diñeiro pagarían 6 anos do incremento salarial que pedimos. Din que resultamos caros con esta crise, pero os nosos salarios son moito mais baixos e temos mais contratos precarios que en Cataluña, Madrid, Francia, Alemania, Bélxica, ou acaso nestes lugares non lles afecta a crise?

Pensa en quen son os Agresores e quen os Agredidos. O noso Convenio axuda a mellorar o resto dos Convenios, por esta razón toda a Patronal quere vencernos, someternos e voltar a ter ao 70% de traballadores eventuais, despedir libremente, contratar ETTs, non pagar as horas extras obrigadas, non dar os días de descanso, e quedarse cunha parte maior dos nosos salarios. A nosa loita é por dignidade e ti sabes do que falamos.

Conseguímolo, o persoal do SIF ten a categoría de xestor/a

2009-05-06T05:54:00.000-07:00

Como xa informamos Hai un mes, despois das demandas presentadas pola CIG reclamando a categoría de xestor/a para o persoal do SIF, a empresa convocou unha reunión co fin de abrir un proceso de negociación.

A empresa puxo por riba da mesa unha oferta para reclasificar ao persoal, sen recoñecer atrasos e pretendendo que calquera demanda individual racharía o acordo. Como resposta, o Comité decidiu dar por rotas as negociacións, nÓs non.

Dende a Sección Sindical da CIG indicámoslle á empresa a nosa disposición a abrir un proceso de negociación, salvagardando o dereito Á tutela xudicial establecido incluso na Constitución. É dicir, se alguén quixera facer valer o seu dereito a ir a xuízo para cobrar atrasos ninguén podía impedirllo.

Posteriormente dende a CIG elaboramos unha proposta argumentada sindical e legalmente, tendo en conta que as demandas xudiciais presentadas non estaban gañadas de antemán. Unha proposta que foi aceptada pola empresa agás no referido ao pago dos atrasos, aceptando a reclasificación con efectos inmediatos.

Ante esta situación convocamos unha asemblea co persoal afectado, explicando o acordo e indicándolle que se trataba sempre dun acordo individual e voluntario.

As persoas que quixeron teñen a categoría de xestor/a dende o 1 de maio, renunciando aos seus atrasos. Pero salvagardouse o dereito a presentar demandas xudiciais por parte das persoas que non queiran cedelos.

Levamos máis dun ano loitando polo dereito do persoal ao ascenso; presentamos 5 demandas xudiciais; convocamos numerosas asembleas ao longo do proceso e chegamos a convocar unha folga que finalmente foi desconvocada por desexo do persoal do SIF.

Para a CIG as demandas e mobilizacións non son un fin en si mesmo, teñen como obxectivo forzar ás empresas para que negocien, polo que tamén traballamos na elaboración de propostas concretas. Así, fomos quen de posibilitar un acordo de recoñecemento de categoría, salvagardando o dereito das persoas que queiran reclamar os atrasos.

Que cada quen xulgue o traballo sindical da CIG, o persoal afectado xa o fixo e por iso a maioría xa ten a categoría de xestor/a dende o 1 de maio.

Unísono recoñece a categoría de xestor e abrese unha negociación

2009-03-24T04:21:00.000-07:00

O pasado dia 17 de marzo estaba prevista a celebración dun novo xuízo de reclamación de categoría de xestora por parte dunha compañeira do SIF da campaña de Orange.

O xuízo non chegou a celebrarse xa que houbo un acordo, recoñecendo Unísono a categoría así como os atrasos.

Anteriormente xa gañaramos un xuízo de reclamación e o pasado día 18 de marzo chegamos a un acordo para o pago dos atrasos que estaban pendentes.

O día 21 de abril debería ter lugar o xuízo de 3 novas compañeiras que reclamaron a categoría de xestora.

Agora a Dirección convocou a toda a representación sindical a unha reunión para o vindeiro día 25 de marzo cun único punto no orde do día, “Categoría traballadores/as SIF”.

Sen prexulgar o resultado da reunión pensamos que as demandas xudiciais emprendidas pola CIG en reclamación da categoría de xestor/a para o persoal do SIF están dando resultados. Polo pronto 2 compañeiras xa teñen a categoría, unha boa noticia non só para elas, si non para todos e todas.

A Inspección recoñece como indefinidos a 3 compañeiros

2009-02-10T05:51:00.001-08:00

Hoxe tivo lugar unha reunión na Inspección de Traballo e Seguridade Social entre o Comíté de Empresa e a Dirección de Unísono.

No mes de decembro, tal e como anunciamos na Memoria 2008, presentamos denuncia ante a Inspección por entender que os contratos de tres compañeiros da campaña de Orange eran fraudulentos e polo tanto deberían pasar a indefinidos.

Para o organismo público os tres contratos foron realizados claramente en fraude de lei, polo que deulle a Unísono duas semanas de prazo para regularizar a situación.

A CIG adhirese a conflito colectivo pola falta de actualización dos salarios

2009-02-10T05:46:00.000-08:00

Onte día 9 de febreiro tivo lugar no SIMA en Madrid un acto de mediación entre Unísono e os sindicatos ante a falta de actualización dos salarios.

A CIG adheriuse ao conflito, mentres que inexplicablemente CCOO e UGT nin sequera compareceron malia que se trata de defender os salarios dos traballadores e traballadoras de Unísono.

Podes consultar aquí a acta.

Victoria sindical fronte a Atento: unha dura lección laboral

2009-02-07T00:38:00.000-08:00

Un recente conflito na empresa de telemarketing Atento na Coruña reflicte a importancia de defenderse sindicalmente. O persoal que reclamou xudicialmente contra unha decisión da empresa seguirá traballando, os que optaron por calar quedaron no paro.

Atento presentou en novembro 27 traslados dende a Coruña para un novo centro en León, aberto con subvencións do goberno central. Entre o persoal trasladado figuraban un delegado e unha delegada da CIG.

Con estes traslados Atento pretendía abaratar o despedimento dos traballadores, e traballadoras, consciente de que ninguen deixa a súa vida atras por 700 euros ao mes.

Ante esta situación a CIG chamou ao persoal a mobilizarse e presentar denuncias, así no mes de xaneiro tivo lugar o primeiro xuizo, coñecendose a sentenza o día 6 de febreiro (data na que estaba prevista un novo xuizo).

A sentenza foi favorable para os traballadores e traballadoras, xa que declarou improcedentes os traslados dos dous delegados da CIG, obrigando a repoñelos nas condicións anteriores, é decir a que sigan traballando na Coruña.

Ante a sentenza e para evitar novos xuizos, a empresa negociou co avogado da CIG a recolocación na Coruña do resto do persoal que optou por emprender accións legais contra o traslado.

O persoal que optou anteriormente polo cobro dunha indemnización e marchar da empresa, que non quixo defender legalmente os seus dereitos, quedou no paro. Unha lección para todos e todas.

Aprazado xuízo reclamacións de categoría

2009-02-03T04:30:00.000-08:00

Hoxe estaba previsto o xuizo de reclamación de categoría das nosas compañeiras Sira, Elda e Alicia, que reclaman a categoría de xestoras como persoal do SIF (Servizo Integral de Facturación) ao abeiro da sentenza gañada da compañeira Luisa e despois de que Unísono se pechara en banda ante calquera posible saida negociada.

Finalmente o xuízo non se celebrou e foi adiado para o 21 de abril, xa que a Inspección de Traballo non remitiu en tempo e forma un informe requirido polo propio xulgado.

Canto nos quere quitar a patronal da carteira

2009-01-30T04:57:00.000-08:00

A patronal de telemárketing ACCE, anunciou que non quere aplicar a suba salarial pactada no artigo 45 do Convenio Colectivo de Contact Center , que era o IPC previsto (2%) mais o 0,25%.

A patronal de telemárketing non tivo ningún inconvinte en ligar a suba salarial a este indicador e historicamente sempre o aplicaron sen problema. Este cambio de posición só responde a unha estratexia que busca aprazar a actualización dos nosos salarios utilizando un subterfuxio legal.

Durante a negociación do Convenio dende a CIG defendemos unha suba lineal, rexeitamos asociar os salarios ao IPC, por considerar que é un indicador manipulado que non recolle a suba real do custe da vida. Si se aplicasen as nosas propostas agora non teríamos ningún problema.

Cando coñecemos a decisión da patronal solicitamos a Unísono que actualizara os salarios, Unísono novamente e na súa liña dixo que non.

En todo caso pensamos que os sindicatos do sector de telemárketing debemos dar unha resposta conxunta ás empresas coa convocatoria inmediata dunha folga en todo o Estado, para exixir que nos paguen o que é noso.

Importes que as empresas pretenden deixar de pagarnos pola cara:

Coordinadora/ nivel 8, 327 euros; Xestora/ nivel 9, 315 euros; Teleoperadora especialista/nivel 10, 298 euros; Teleoperadora entrada/ nivel 11, 285 euros.

Ese diñeiro é noso, xa esta ben utilizar subterfuxios legais para intentar socabar o que é noso.

E por si non queda claro ccal é o IPC previsto podedes consultar aquí o aprobado no Consello de Ministros do pasado 9 de xaneiro.

Damos conta do noso traballo

2009-01-05T03:13:00.000-08:00

Estes días comezamos o reparto da Memoria Sindical correspondente ao ano 2008, nela tratamos de dar contas do traballo sindical realizado ao longo dese ano, nun exercicio de transparencia sindical.

Si non a recibiches podes solicitarlla a calquera delegada da Sección Sindical da CIG en Unísono.

Para a Inspección de Traballo a campaña "desbordamento" era fraudulenta.

2008-11-12T01:44:00.000-08:00

Como xa denunciamos anteriormente cando se produciron os despedimentos na Campaña “desbordamento” de Orange, pensabamos que estabamos ante unha campaña fraudulenta, polo que presentamos denuncia ante a Inspección de Traballo.

Por outra parte a asesoría xurídica da CIG ten presentado demandas individuais daquelas persoas que non asinaron o finiquito.

Agora a Inspección de Traballo contestounos que dita Obra (desbordamento de chamadas de Orange) non constitúe unha campaña, encubrindo contratacións eventuais fraudulentas, dándonos así a razón.

Ase mesmo Unísono comprometeuse ante a Inspección de Traballo a “entregar as cantidades fraudulentamente non entregadas (correspondentes ao finiquito e as vacacións non disfrutadas) aos traballadores que pasaron desta obra á principal de Orange mediante un simple cambio na cláusula contractual.”

Unha vez mais, grazas as nosas denuncias, queda clara a actuación fraudulenta de Unísono.

Agardamos que para demostrar o seu tan cacarexado “chamamento ao dialogo” RRHH de Unísono recoñeza a improcedencia dos despedimentos dos compañeiros inxustamente despedidos que presentaron demandas e que sexan readmitidos.

Por ultimo lembrarvos que ante calquera despedimento ou remate de contrato “temporal” non asinedes o finiquito-liquidación sen que consultar primeiro coas delegadas da CIG.

Mobilízate coa CIG fronte a crise

2008-11-12T01:38:00.000-08:00

Ao longo dos últimos anos os traballadores e traballadoras sufrimos as consecuencias da especulación instalada na economía, que se traduciu nunha desmedida alza do prezo da vivenda e dos produtos de consumo e dos servizos. Sufrimos tamén a implantación dun modelo laboral baseado na precarización das condicións laborais coa extensión das xornadas laborais; o incremento brutal das cargas de traballo; pola subcontratación e por unhas altas taxas de temporalidade. Os traballadores e traballadoras sufrimos a peor parte nos tempos de bonanza.

Agora a especulación levou ao sistema a unha crise sen precedentes que ameaza cada día a un maior número de postos de traballo, pola vía dos Expedientes de Regulación de Emprego, pero tamén pola rescisión dos contratos temporais. Tamén estamos ante un constante empeoramento das condicións laborais.

O Goberno está poñendo en marcha medidas económicas illadas que fundamentalmente consisten en inxentes axudas (sen ningún tipo de control democrático) ás Entidades Financeiras (responsables en gran medida da crise) e ao resto das empresas.

Neste senso, dende a Confederación Intersindical Galega demandamos un paquete de medidas económicas, sociais e laborais fronte á crise, para que non sexamos de novo os traballadores e as traballadoras quen paguemos a peor parte.

Cando os despedimentos están na axenda da maior parte das empresas, cando estas tratan de reducir custes empeorando as condicións laborais, os sindicatos non podemos ser testemuñas mudas ante esta situación. É preciso mobilizarse a prol dun novo modelo máis xusto e sustentable socialmente.

Dende esa perspectiva, o vindeiro día 13 de novembro a CIG ten convocadas manifestacións en todo o país, para reivindicar un novo modelo no que economía estea ao servizo das persoas.

O vindeiro 13 de novembro participa nas manifestacións convocadas pola CIG:

Vigo: Saída ás 20:00 da Vía Norte.

Mobilización contra a xornada de 65 horas

2008-10-10T07:48:00.001-07:00

O día 7 de outubro traballadores e traballadoras de toda Europa estaban convocados a mobilizarse contra a ratificación da Directiva das 65 horas. En Galiza, a CIG convocou asembleas e concentracións en 8 comarcas.A Directiva de Tempo de Traballo, aprobada polo Consello de Ministros de Emprego da Unión Europea o pasado mes de xuño, debe ser ratificada agora polo Parlamento Europeo.Esta Directiva modifica a actual xornada máxima semanal e redefine o concepto “tempo de traballo”, introducindo dúas novas categorías:

Tempo de atención continuada: Período no que o traballador ou traballadora ten a obriga de estar dispoñible no centro de traballo.

Período inactivo do tempo de atención continuada: Período no que otraballador ou traballadora está dispoñible no centro de traballo, pero que non é requirida pola empresa para realizar traballo efectivo.

Por outra banda a Directiva consagra e xeneraliza a cláusula opt-out, pola que se establecen supostos de renuncia á actual duración máxima do tempo de traballo semanal de 48 horas semanais, establecéndose unha xornada de 60 horas con carácter xeral e de 65 horas semanaisnalgúns casos. Facilitando os acordos individuais para alongar a xornada de traballo.Para evitar que saia adiante esta Directiva o movemento sindical europeo mobilizouse o 7 de outubro ao longo do continente, tamén en Galiza. A CIG convocou asembleas e concentracións en Lugo, A Mariña, A Coruña, Ferrol, Santiago, Ourense, Pontevedra e Vigo.

De diálogo nada, imcumprimentos moitos

2008-10-02T11:05:00.000-07:00

Cada vez que temos unha reunión con RRHH insisten na necesidade de manter un bo marco de relacións laborais no que prime o diálogo, despois na práctica todos son incumprimentos por parte da empresa. Xa non é que non negocie, é que nin sequera informa á representación sindical tal e como establece a lei.

Transformación en Indefinidos

Nestes momentos hai un proceso de conversión de contratos temporais en indefinidos realizados segundo a empresa ao amparo do artigo 15 do Estatuto dos Traballadores. É curioso que non poñan en marcha o proceso de indefinidos do Convenio, pero fan indefinidos a dedo.

En todo caso si que é certo que hai contratos fraudulentos que deben ser transformados en indefinidos, e así o temos denunciado ante a Inspección de Traballo.

Coordinadores Orange en funcións de inferior categoría

Hai un grupo de coordinadores de Orange, nivel salarial 8, que está realizando funcións de teleoperador especialista, en aplicación da mobilidade funcional. O Estatuto dos Traballadores/as é claro:

“a mobilidade funcional para a realización de funcións non correspondentes ao grupo profesional ou a categorías equivalentes só será posíbel se existisen razóns técnicas ou organizativas que a xustificasen e polo tempo imprescindíbel para a súa atención. No caso de encomenda de funcións inferiores esta deberá estar xustificada por necesidades perentorias ou imprevisíbeis da actividade produtiva. O empresario deberá comunicar esta situación aos representantes dos traballadores.”

Unísono non informou á representación sindical, nin xustificou a necesidade de asignar funcións de inferior categoría a este persoal.

En definitiva, para Unísono dialogar é que a representación sindical diga amén ao que diga RRHH, impresentable.

Convenio Colectivo 2007-2009: Só o 1,5% de novos contratos indefinidos

2008-09-24T00:48:00.000-07:00

O 20 de febreiro do 2008 entraba en vigor o Convenio Colectivo 2007-2009, un acordo que cabe lembrar non foi subscrito pola CIG.

O artigo 14 do Convenio establece que o 30% do persoal de operacións vinculará a súa relación laboral baixo a modalidade de contrato indefinido. Esta porcentaxe, que estivo a debate durante o período de negociación, finalmente non foi modificada.

A conversión de contratos temporais en indefinidos debe realizarse no primeiro trimestre do ano, pero desta volta alongouse no tempo debido a diferenzas en gran parte das empresas. É agora cando podemos facer unha valoración global.

O sector de Telemárketing dá emprego en Galiza aproximadamente a 6.500 persoas. Este ano, en aplicación do convenio, foron transformados en indefinidos pouco máis de cen contratos. Pola contra a taxa de temporalidade real está por riba do 70% que marca como límite o convenio para o persoal de operacións.

Cando as empresas levan varios anos de funcionamento xa teñen o 30% de persoal indefinido. Dado que non se modificou esta porcentaxe no Convenio, a maior parte das empresas din que só teñen a obriga de realizar transformacións en indefinidos para cubrir as baixas na empresa do persoal fixo.

Por outra parte existe certa “picaresca” empresarial, facendo uso da liberdade organizativa que lles concede a lexislación, realizan contratacións indefinidas a quen queren sen cumprir os requisitos establecidos no Convenio. Posteriormente pretenden incluír os contratos indefinidos realizados a dedo (en moitos casos para cobrar subvencións) para o cálculo do 30% establecido no Convenio. Un auténtico fraude.

Este fraude repítese en todas as grandes empresas: Atento, Eurocen, Unísono ou Bosch, polo que temos presentado un conflito colectivo nesta última empresa, que está previsto para o mes de outubro e que será de gran importancia para todo o sector, clarificando se esta “picaresca” empresarial é legal.

En definitiva, o balanzo dun ano de convenio en materia de emprego non podía ser máis pobre: pouco máis de 100 novos contratos indefinidos sobre 6.500 traballadores/as (1,5% máis); a temporalidade por riba do 70%; e actuacións fraudulentas das Direccións das empresas.

Movémonos ante a posible desaparición da televenda

2008-09-16T05:54:00.000-07:00

O pasado agosto o Ministro de Sanidade e Consumo anunciaba unha nova lei para o vindeiro mes de outubro que podería considerar a televenda como “spam telefónico”, esta nova lei poría en práctica a directiva comunitaria 2005/29.

O Ministerio cualificou como competencia desleal e como “spam telefónico” as chamadas ofrecendo produtos comerciais non solicitados polos clientes, anunciando posibles medidas legais contra as empresas que realicen a actividade de televenda.

Estando de acordo coa necesidade de regular a televenda, entendemos que esta lexislación pode afectar gravemente ao emprego no sector de telemárketing.

Numerosas empresas (de telecomunicacións, banca, seguros, etc.) teñen subcontratado os servizos de atención ao cliente e os servizos de televenda a través de contratas do sector do telemárketing, actualmente aproximadamente 1.000 persoas en Galiza realizan labores de televenda dende os centros de chamadas radicados na comunidade, nomeadamente na Coruña e Vigo

Por outra parte gran parte das chamadas telefónicas ofrecendo produtos de empresas españolas están sendo realizadas dende terceiros países, en especial dende América Latina. En moitos caos as diferenzas horarias estarían detrás dun gran número de chamadas realizadas en horas “intempestivas” polo que as subcontratas de telemárketing deslocalizadas en terceiros países poden ser a principal fonte do denominado “spam telefónico”.

A nova lexislación que o Ministerio de Sanidade e Consumo quere por en marcha só sería de aplicación no territorio do Estado Español, non afectaría polo tanto aos centros de chamadas establecidos en América Latina e que realizan campañas de televenda para empresas españolas. Deste xeito o “spam telefónico” podería continuar dende outros países, contribuíndo a destrución de emprego na Galiza e no resto do Estado, pero sen que a medida protexa de xeito real os dereitos dos consumidores.

Ante esta situación temos solicitado ao Ministerio de Sanidade e Consumo que inclúa á representación sindical nos contactos previos á posta en marcha da nova lei, co fin de que esta afecte na menor medida posible aos postos de traballo e garanta de xeito efectivo os dereitos dos consumidores.

Copia denuncia na Inspección de Traballo

2008-08-25T05:04:00.001-07:00

Podedes ver aquí a copia da denuncia presentada na Inspección de Traballo relativa aos 45 despedimentos dos compañeiros e compañeiras da campaña "Desbordamento-Orange".

Orange despide en todo o Estado

2008-08-22T04:05:00.000-07:00

A compañía de telecomunicacións Orange estase desfacendo dos seus servizos de atención ao cliente no Estado, servizos que tiña subcontratados en numerosas empresas de telemárketing. Aos despedimentos do pasado día 19 en Unísono Vigo súmanse os realizados en Salamanca ou Zaragoza.

Durante este ano 2008 houbo meses nos que a empresa Orange tivo mais baixas que altas de clientes, ante esta situación reaccionou dándolle un novo pulo ao seu plan para reducir custes optando por incrementar o proceso de deslocalización.

Os servizos de atención ao cliente das empresas de telecomunicacións levan tempo deslocalizandose cara a países de América latina, un proceso no que as contratas españolas de telemárketing non perden, xa que a maior parte dos centros de chamadas cara os que se deslocaliza o traballo son filiais de empresas do estado español. Os únicos que perden neste proceso son os traballadores e traballadoras do Estado que perden o seu posto de traballo.

Unísono é un claro exemplo desta situación, Orange segue sendo o seu cliente, pero en Chile. As únicas perdedoras son as 45 persoas que foron despedidas este mes en Vigo.

Para a deslocalización dos servizos de atención é preciso que as empresas de telemárketing transfiran aos países de América Latina os datos dos clientes de Orange no estado español. Transferencias que foron aprobadas pola Axencia Estatal de Proteccións de Datos malia os recursos presentados pola CIG.

Despedimentos de 45 fixos nunha Campaña fraudulenta de Orange

2008-08-21T04:35:00.000-07:00

O día 19 de agosto a dirección de Unísono en Vigo comezou a despedir de xeito fulminante ao persoal da “Campaña de Orange desbordamento”, unha campaña inexistente que encubre un fraude na contratación. Os despedimentos afectan a 45 persoas.

A empresa nas cartas de despedimento ao persoal incumpriu os días de preaviso establecidos por lei, días que debería abonar na correspondente liquidación, toda vez que nos contratos do persoal non consta que a duración estimada fose inferior a un ano.

Para a CIG os 45 despedidos eran fixos, xa que había un fraude evidente nos seus contratos.

Todos sabemos que inicialmente a apertura de Unísono-Chile estivo plagada de problemas, polo que as chamadas da campaña de Orange retornaron a Vigo.

Ante a suba do volume de chamadas a empresa fixo contratacións eventuais, é preciso aclarar que os contratos por acumulación de tarefas non poden superar os 4 meses no prazo dun ano.

Posteriormente transformou os contratos eventuais en contratos por Obra para unha campaña denominada “Desbordamento Orange” (desbordamento é igual que acumulación de tarefas), un auténtico fraude.

Ante esta situación recomendamos ao persoal non asinar o finiquito, inexplicablemente un delegado doutro sindicato despois de consultar a Madrid (como sempre) díxolles que asinaran a liquidación. Perderon así o dereito a reclamar os días de preaviso e a indemnización dos 45 días por ano traballado do despido.

Esta é a nosa opinión sobre estes 45 despedimentos e así o temos denunciado ante a Inspección de Traballo. Quedan varias persoas que non asinaron e xa estamos en comunicación con elas para presentar as correspondentes demandas si a empresa non se senta a negociar.